AJ Perez' funeral
CEBU, Philippines - Mibaha ang luha sa mga Star Magic talents dihang hingpit na nga gisirado ang lungon ni AJ Perez pasado ala una kagahapon didto sa Manila Memorial Park, samtang milanog sa palibot ang awit nga “In The Arms Of An Angel.”
Mga gipalupad nga ballons ug butterflies sa sementeryo dungan sa pagdayon na gyud nga lubong ni AJ.
Una niini, 50 ka vans ang misalmot sa funeral march gikan sa Christ The King Chapel sa Quezon, City paingon sa sementeryo nga nahimutang sa Paranaque, City.
Mga kabanay, higala ug kaubanan ni AJ sa showbiz ang mihatod niya, samtang ang iyang classmates maoy mialsa sa lungon niini paingon sa iyang pahulayang dayon.
Ang mga sakop sa iyang pamilya maoy katapusang mitan-aw niya una hingpit nga gisirado ang iyang lungon.
Una niini, ang mga kauban ni AJ sa grupong Gigger Boys nga sila si Sam Concepcion, Enrique Gil, ug Aaron Villaflor maoy milangkub sa offertory atol sa Misa. Human niini, gipahigayon ang last viewing diin milinya ang mga higala ug mahal sa kinabuhi sa actor, lakip na ang ABS-CBN executives nga sila si Cory Vidanes ug Linggit Tan.
Si Fr. Tito Caluag maoy mipahigayon sa misa didto sa Christ The King.
Samtang sa necrological service niadtong Lunes sa gabii gihatagan og standing ovation si AJ sa iyang mga classmates isip pasidungog sa iyang pagkatawo ug pagka performer.
Nakatambong pa gyud sa katapusang gabii sa haya ni AJ sila si KC Concepcion, Sam Milby, ug Star Magic chairman emeritus nga si Johnny Manahan. Gikan pa ang tulo sa U.S. para sa Star Magic World Tour.
Si Fr. Gerry Orbos maoy nag-misa sa katapusang gabii sa haya sa young actor.
- Latest
