Dennis naka-recover na sa break up kay Jennylyn

Balitang babalik sa pagpo-produce ng TV show ang Regal Entertainment, Inc. pero hindi sa ABS-CBN, kundi sa TV5. Ibabalik ni Mother Lily Monteverde ang Regal Shocker na isa sa mga favorite shows sa Dos dati.

Wala pang detalye sa Regal Shocker, gaya kung sino ang magdidirek at kung kailan ito sisimulan, pero ang horror show ang ipapalit sa Midnight DJ na malapit nang magtapos.

Karamihan sa Regal babies ay nakakontrata sa ABS-CBN at GMA 7, sino kaya ang makukuhang mag-guest sa weekly episode ng Regal Shocker?

* * *

Isa si Noel Ferrer sa mga huling nakausap ni AJ Perez bago ito pumanaw dahil kay Noel idinaan ang birthday greetings kay Ryan Agoncillo na nakasama niya sa movie na Kasal, Kasali, Kasalo (KKK) at ang sequel nito dahil siya ang gumanap na kapatid ni Judy Ann Santos.

Nabanggit din ni AJ na gusto niyang mag-guest sa next edition ng Talentadong Pinoy Celebrity Edition. Bago umalis si Noel, ni-remind siya ni AJ to watch Maalaala Mo Kaya (MMK) sa April 30 at magiging proud ito sa kanya. Excited din si AJ na i-verify kay Noel kung totoo ang sinabi ni direk Joey Reyes na baka may third installment ang KKK movie nila.

Ang ikinaloka ni Noel, nag-reflect sa fone niya ang missed call ni AJ ng 6 a.m. eh, that time, wala na siyang buhay. Inisip na lang nito na baka ang daddy ni AJ ang tumawag sa kanya para ipaalam ang nangyari sa anak.

* * *

Ang unang gagawin ni Dennis Trillo ’pag natapos ang taping niya ng Dwar­fina ay ang magpagupit dahil may konting buntot ang buhok niya para sa role ni Lyndon na sa mga susunod na episode ay magiging duwende na rin. Kaaliw ang transformation niyang maging duwende.

Sinagot ni Dennis ang sinabi ni Heart Evangelista na iniiwasan niya ang aktres at dahil may BF ang dalaga ay ayaw niyang magka-issue sila. “Oo” ang sagot nito sa tanong kung naka-recover na siya sa break-up nila ni Jennylyn Mercado at sa tanong kung nagtatanong ba ang anak niyang si Calix kung bakit hindi na sila pumupunta sa bahay ni Jennylyn para makipaglaro kay AJ, hindi ang sagot ng aktor. Pareho silang busy na mag-ama sa rami ng kanilang activities together.

Sa May, sisimulan na ni Dennis ang shooting ng My Neighbor’s Wife after ng workshop nila nina Lovi Poe, Carla Abellana, at Jake Cuenca. Sa Saturday, sa GMA 7, mapapanood ang Black Saturday special ng APT Entertainment, ang Maestra sa script at direction ni Jun Lana at kasama niya sina Agot Isidro at Rocco Nacino.