TP Audition sa Cebu Karon

Morisette, Gerald, Fire Attraction ug Joseph guests

CEBU, Philippines - Mupauli karong adlawa dinhi sa Sugbo ang laing garbo sa mga sugbuanon nga inanay na nga mikulit og ngalan sa kaulohan pinaagi sa TV5. Siya walay lain kundili si Morisette Amon, kinsa runner-up sa reality show sa Kapatid Network, ang Star Power niining bag-o lang.

Makauban ni Morisette si Gerald Santos nga iyang partner sa youth oriented show sa TV5 nga Fantastik matag Domingo, alas dos sa hapon. Ang duruha adunay kaugalingong segment sa maong show nga gitawag og “Heart Beatz.”

Ang duruha mulugwa sa Talentadong Pinoy auditions karong adlawa nga magsugod alas onse karong buntag diha sa SM City Cebu Entertainment Plaza. Mutambong pud sa audition ang Ultimate Talentado 2011 nga si Joseph the Artist ug ang laing garbo sa Sugbo Fire Attraction.

Ugma, si Morisette ug Gerald dunay show sa ala una sa hapon diha sa Gaisano Capital South. Pagka ugma, March 27, alas kwatro sa hapon ipahigayon ang show ni Gerald diha sa SM City Entertainment Plaza, alang sa iyang “Pinakahihintay - Repackaged Edition” guest gihapon si Morisette.

Si Morisette kanhi winner sa singing contest sa Sonshine Radio 765 kHz., busa suportado siya sa maong estasyon niining iyang pagpauli.