Marian ug Bela "okay" na, pero dili "friends"

CEBU, Philippines - Mapasalamaton si Bela Padilla sa pantaserye nga Machete gumikan kay pinaagi matud pa sa maong proyekto nailhan na siya sa publiko sa positibo nga pamaagi.

Kaniadto niya pa nailhan siya sa publiko isip ang babaye nga gikaaway ni Marian Rivera, karon kung musuroy siya sa malls, tawgon na matud pa siya og “Aginaya” ang ngalan sa iyang character sa Machete.

Sa samang higayon, si Bela nga dinhi sa Sugbo niadtong Sabado kauban sila si Chariz Solomon, Ryza Cenon, ug Aljur Abrenica, miangkon nga kusog gyud ang Mara Clara nga maoy ilang unang gikaatbang alang sa ratings game.

Pero suma pa niya nga bisan og napildi sila sa rating, ka-level ra nila ang ubang teleserye sa GMA-7 nga wala matud pa miubos sa 10% ang rating ug mapasigarbuhon siya niini.

Dili pud matud pa siya apektado sa mga pagsaway nga nadawat sa Machete tungod kay dili man siya maoy direkta nga giigo niini, kundili ang kinatibuk-ang production team.

Gawas pa, lig-on na matud pa siya alang sa bisan unsa pa man nga negatibong istorya o mga pagsaway human sa kontrobersiya nga iyang nalambigitan kaniadto batok ni Marian Rivera.

Giangkon niya nga dako gyud og nahimong kadaot ang maong kontrobersiya nga iyang nalambigitan sa milabay nga tuig, inay makatabang kini sa iyang career.

Hinuon, giisip na lamang niya nga baptism og fire niya sa showbiz ang nahitabo nga maoy nakapalig-on niya.

Giangkon niya nga bisan og nahusay na sila ni Marian sa opisina ni GMA-7 Senior Vice President for Entertainment Wilma Galvante, dili pa gyud sila friends sa nahisgutan.

“You can be okay with someone but you can’t be friends right away, nagkanayon ang pag-umangkon ni Robin Padilla.

Opinionated

Samtang gibutyag ni Bela nga niadtong high school pa siya ganahan kaayo siya og lantugi tungod kay puno man siya sa opinion sa bisan unsa nga mga hisgutanan.

Pangandoy gyud niya nga mamahimong newscaster, apan kay nasulod man siya sa showbiz, buot niya nga mukuha og Creative Writing course sa University of the Philippines tungod kay ganahan man pud siya magsuwat og bisan unsa.

Ganahan usab kaayo siya nga mubasa, pero practical siya sanglit adto siya sa bargain mupalit pirmi og mga libro nga nagkantidad og P100 paubos. Katarungan niya, ganahan siya sa baho sa mga pahina sa daan nga libro.

Samtang giangkon niya nga bisan og nagbuwag na sila ni Jason Abalos, tinuod ang gisulti sa young actor nga padayon gihapon nga bukas ang ilang komunikasyon.

Mikomedya pa siya nga labihan matud pa kataas sa iyang buhok dihang giingnan nga namahayag si Jason nga wala pay babaye nga nakapuli kang Bela sa kasingkasing niini.

Pero seryoso siya dihang namahayag nga ang actor gihapon ang lalaki nga labing duol sa iyang kasingkasing pagkakaron ug wala pa siyay plano nga makauyab og lain tungod kay pahimuslan pa niya ang mga breaks nga inanay na nga miabot sa iyang career.

Namahayag usab si Bela nga naa sa ilang relihiyon nga Jehovah’s Witness nga ang unang uyab mao na gyud ang pakaslan.

Si Jason maoy first boyfriend ni Bela diin milungtad og tulo ka tuig ang ilang relasyon, apan nahukman nila nga magbuwag lang una aron mas mahatagan og igong pagtagad ang ilang isig ka showbiz career.