Donaire nakatikim ng pangaral kay Ted Failon

Type ko ang pangangaral ni Ted Failon kay Nonito Donaire Jr. nang mag-guest ito kahapon sa radio program nila ni Papa Noli De Castro.

Diretsahang sinabi ni Papa Ted kay Nonito na mahalin nito at igalang ang kanyang ina at ama dahil isa siya sa mga nalungkot nang mapanood niya sa TV ang pagbabangayan ni Nonito sa mga magulang nito.

* * *

Nakikiramay ako sa mga naulila ng beteranong aktor na si Armando Goyena na sumakabilang-buhay kahapon.

Si Armando ang ama nina Maritess Revilla at Tina Revilla. Siya ang lolo ng magkapatid na Bernard at Mico Palanca.

Kung hindi ako nagkakamali, ang Yamashita : The Tiger’s Treasure ang huling pelikula ni Mang Armando. Si Chito Roño ang direktor ng pelikula at tuwang-tuwa siya noon dahil nabigyan siya ng pagkakataon na makatrabaho si Mang Armando na sikat na matinee idol noong kapanahunan nila.

Year 2001 nang gawin nina Chito at Mang Armando ang Yamashita : The Tiger’s Treasure. Starring sa pelikula sina Camille Pratts, Danilo Barrios, Albert Martinez, at si...Rustom Padilla na mhin na mhin pa noon dahil siya ang gumanap na kontrabida.

Sampung taon na ang nakalilipas mula nang ipalabas sa mga sinehan ang Yamashita : The Tiger’s Treasure. Hindi na gumawa ng pelikula si Mang Armando, naging movie director din si Albert Martinez at naging BB Gandanghari si Rustom.

* * *

Mali ang tsismis na may anak si Danilo Barrios kay Jaycee Parker. Isang close kay Danilo ang nagtuwid sa maling balita dahil ibang babae at hindi si Jaycee na dating member ng Viva Hotbabes ang naanakan ng aktor.

May twist ang correction please ng close friend ni Danilo. Hindi niya matandaan ang name ng babae na ina ng anak ni Danilo. Basta ang natatandaan niya, dating napapanood sa mga programa ng GMA 7 ang mystery girl. Mystery girl daw o!

‘Yan ang assignment ko ngayon sa readers ng PSN, ang alamin ang katauhan ng babae.

* * *

Totoo ang tsismis, si Joey Marquez ang ipinalit kay John Estrada sa Hapi Togeder at dahil nag-ober da bakod uli si John sa ABS-CBN, Hapi-er Togeder na ang bagong title ng sitcom ng TV5 na iniwanan niya.

Umapir na si Joey sa Hapi-er Togeder noong Martes at isa lang ang meaning nito, Kapatid na rin ang komedyante na identified sa Kapuso network.

Hindi lamang si Joey ang mapapanood sa Hapi-er Togeder dahil ilalagay rin dito si Wendell Ramos na nag-babu sa Bubble Gang at sa GMA 7. “Mag-explore” ang dahilan na ibinigay ni Wendell sa paglipat niya sa Kapatid network.

* * *

Sina Bearwin Meily, James Blanco, at Karel Marquez ang mga bagong talent ni Annabelle Rama.

Pormal na ipapakilala ni Bisaya sa entertainment writers ang kanyang mga bagong alaga. Kung kailan at saan, hindi ko sasabihin para hindi matunugan ng mga gaka.

Dahil si Annabelle na ang manager nila, hoping sina Bearwin, James, at Karel na magiging masigla na uli ang takbo ng kanilang mga showbiz career.