Christian Gikawras

CEBU, Philippines - Nakawrasan ang liog ni Christian Bautista didto sa Milan, Italy atol sa concert sa Champions niadtong March 6. Pero padayag ni Christian nga apil pud matud pa siya sa mabasul tungod kay mikanaog gyud siya sa stage ug mipaduol sa mga tawo nga wala mananghid sa security. Nasayud man gud matud pa siya nga gihidlaw sa Pilipinas ang mga Pinoy didto busa iya kadtong gibuhat..

Paolo Avelino scandal?

Gikagubtan karon ang Bench summer campaign photos sa StarStruck graduate nga si Paolo Avelino gumikan kay matud pa misiwil ang dili unta angay musiwil. Ang pangutana karon sa mga himantayon mao ni: gituyo o wala damha? Ang nakakita gyud sa hulagway nagkanayon nga kung i-zoom out ang litrato maklaro gyud ang “asset” ni Paolo. Hinuon may nanalipod sa nahisgutang young star pinaagi sa pag-ingon nga tataw nga inosente si Paolo niini—wala gyud gani siya’y ideya nga ingon niini na diay ang nahitabo. Si Paolo maoy amahan sa anak sa Kapuso star pud nga si LJ Reyes.

“Mara” dakong buhi!

Kung pinangita karon sa Mara Clara ang character ni Katryn Bernardo gumikan sa nagkainit na gyud og maayo nga dagan sa panghitabo sa number one teleserye sa nasud, sa tinuod nga kinabuhi mipatim-aw na ang sikat nga young star.

Sila si Julia Montes ug Katryn Bernardo didto sa ABS-CBN compound kagahapon sa hapon aron tukion ang umaabot nga pelikula para sa Star Cinema. In short nag-story conference na kagahapon ang hottest young stars karon sa tibuok Pilipinas!

Phil Younghusband miklaro

Mitingog na si Phil Younghusband kabahin sa isyu nga naglambigit kaniya kang Denisse Oca. Matud niya, managhigala ra sila ni Denise—walay kapin, walay kulang. Si Denise anak sa character actress nga si Melissa Mendez. Niining bag-o may mikatap nga hulagway nilang duha ni Phil hinungdan nga gitumbok siya nga girlfriend sa sikat nga Azkals player.

Alice patyon ni Wendell

Gawas sa sitcom nga “Hapi-er Togeder kauban si Joey Marquez kausa sa usa ka semana sa TV5, musulod si Wendell Ramos sa Babaeng Hampaslupa, isip hired killer nga mahigugma kang Alice Dixon. Si Wendell mipirma og exclusive contract sa TV5 niadtong Martes.

Armando Goyena mipanaw

Mipanaw ang legendary actor nga si Armando Goyena kagahapon sa udto. Si Armando maoy usa sa labing sikat nga leading men sa nataran sa LVN Pictures kaniadto. Lolo siya nila ni Bernard ug Mico Palanca.

Isabelle ipares ni Pacman

Mipirma na si Isabelle Daza og exclusive contract sa GMA-7 niadtong Martes sa hapon. Lakip sa iyang proyekto mao ang Party Pilipinas sugod karong Domingo. Siya pud maoy co-host sa umaabot nga bag-ong show ni Manny Pacquiao karong Hunyo.

Ex ni Coco si “Gabriela”

Kumpirmado na nga si Katherine Luna ang mudala sa papel nga Gabriela Silang sa Part 1 sa Henerala series sa Cinemalaya entry ni Mario O’Hara nga may working title nga “Ang Babae Ni Diego Silang.” Nag-meeting na silang duha niadtong Martes. Kahinumduman nga si Mario O’ Hara pud ang naghimong best actress kang Katherine kaniadto pinaagi sa “Babae Sa Breakwater.” Si Katherine uyab kanhi ni Coco Martin diin gidungog nga duna silay anak, apan wala angkona sa award-winning actor.