Coco mulugwa sa ASAP

CEBU, Philippines - Mulugwa sa ASAP Rocks ugma ang tanang casts sa ‘Minsan Lang Kitang Iibigan” pinanguluhan sa bida niini nga si Coco Martin.

Dawn nakauyon sa co-stars

Nahugyaw si Dawn Zulueta sa mga batan-ong co-stars niya sa remake sa ‘Mula Sa Puso” nga sila si Lauren Young, JM de Guzman ug Enrique Gil. Karong buwana giingong isalida sa ABS-CBN ang maong serye.

Richard gikagubtan ang kagwapo

Perte matud pang gwapoha ni Richard Gutierrez sa iyang Captain Barbell costume nga gipahimo didto sa Hongkong. Best in tweet si Michelle Madrigal kabahin niini, nga gi-retweet pud ni Camille Prats ug sa uban pang Kapuso stars.

Green Rose mahuman nag taping

Tungod kay 10 months ago pa sila nagsugod og taping, duha ka taping days na lang ang nahibilin para sa Green Rose. Pero giklaro ni Anne Curtis nga makita pa sila sa telebisyon sa hataas nga panahon.

Bianca problemado sa helper

Namoblema ug miulbo ang kaspa ni Bianca King kagahapon gumikan kay nakabuak og butang ang ilang batan-on nga helper kagahapon. Naglibog siya unsay buhaton aron dili na magdanghag, kay kun iyang pabayron, dili matud pa ni makabayad.

“Matira ang matibay”

Wala mahulga si Phil Younghusband sa balita nga naninguha pagbalik si Luis Manzano kang Angel Locsin. Suma pa niya, wala siya masayod unsay nahitabo sa relasyon nila ni Luis ug Angel kaniadto ug dili pud matud pa siya manggilabot tungod kay wala siyay labot niini. Ang iyaha lang mao nga maningkamot siya nga positibo ang iyang tinguha kang Angel.

Kausaban sa Telebabad

Nausab na ang Telebabad block sa GMA-7 sukad kagabii. Ang “Magic Palayok” gihapon maoy mibukas sa primetime sa GMA-7, gisundan sa “24 Oras” ug ‘Dwarfina.” Gisundan na kini sa “I Heart You Pare” “The Baker King” ug kinatumyan na ang “Machete,” sa w ala pa magsugod ang Bubble Gang.

Ayaw panghilabot

Supak si Pinay international singer Lea Salonga sa gidusong ordinansa sa Ayala Alabang nga kinahanglang may prescription kun mupalit og condom ug contraceptives. Gipabuhagay ni Lea ang iyang gibati pinaagi sa blog niya nga, “You Don’t Have Any Business Having Sex.”

Paulo Regal baby na

Mipirma og exclusive contract sa Regal Films ang StarStruck 4 alumnus nga si Paulo Avelino niadtong March 2. Gipaabot pud matud pa nga daghan ang makugang sa sexy pictorial ni Paulo para sa Bench.

Direk Rory para sa EnRich

Si Rory Quintos maoy direktor nila ni Erich Gonzales ug Enchong Dee para sa remake sa ABS-CBN’ sa Mexican telenovela, Maria la del Barrio.

Sexbomb Dancers mulugwa sa Happy Yipee!

Human gitangtang sa Eat Bulaga, napanlantawan nga hingpit na gyud nga mubiya sa nataran sa GMA-7 ang sikat nga all-female sing and dance group nga Sexbomb.

Ang hugyaw kay sa karibal nga programa pa gyud sila unang mulugwa human sa nahisgutang pagkatangtang.

Ang tsika sa ABS-CBN mao nga karong adlawa makita ang Sexbomb Dancers sa Happy, Yipee, Yehey, karong udto, March 5.

Sa nasayran ang ilang manager nga si Joy Cancio maoy choreographer sa Happy Yipee, ug gituhuan nga usa kini sa mga rason nganong gitangtang ang Sexbomb sa Eat Bulaga.

Pwes, naghinamhinam na si Toni Gonzaga nga makauban pagbalik ang Sexbomb, nga una niyang nakatrabaho dihang nahimo siya nga host sa Eat Bulaga lima ka tuig ang milabay. Matud ni Toni nga maningkamot gyud siya pagsayaw kauban ang Sexbomb.

Ang mga hosts nga sila si Randy Santiago ug John Estrada naghinamhinam na pud niining unang higayon nga mahimamat nila ang Sexbomb.

“Kami dito sa Happy Yipee Yehey! happy lang kami, walang away-away. Kaya sobrang masaya talaga kami na i-guest ang SexBomb dito sa show dahil alam namin na saya lang din ang hatid nila para sa ating mga kababayan.”

Samtang si Mariel Rodriguez mibahad nga dili niya atrasan ang sikat nga grupo kun hagiton siya og showdown.

“Kung ‘yan ang magpapasaya sa sambayanang Pilipino, I’ll give my best shot this Saturday,” niya pa. (BANAT NEWS)