Zach Mariano

CEBU, Philippines - Apil ang Sugbuanong model nga si Zach Mariano (Mariano Dandie Dimataga, ang tinuod ngan) sa game show ni Eugene Dominggo sa TV5 sugod karong Sunday 1-2pm. Makauban niya sila si Andrew Wolf ug Jon Avila isip mga assistants ni Eugene, kauban usab ang Tres Marias nga sila si Wendy Valdez, Regine Tolentino, ug Mocha.

Ambassador Kris Aquino

Si Kris Aquino maoy bag-ong Habitat Nation Builder ambassador sa Habitat for Humanity. Misaad pud si Kris nga mo-donate og usa ka balay matag buwan.

Valerie sa TV5

Apil si Valerie Concepcion sa umaabot nga teleserye sa TV5, ang “Nagbabagang Bulaklak” diin si Ruffa Gutierrez maoy bida.

Hugyaw ang TV5

Ang TV5 maoy dunay exclusive coverage sa Tatak EDSA 25: Pilipino Ako. Ako Ang Lakas ng Pagbabago, usa ka show isip paghandum sa makasaysayanong EDSA revolution ugma puhon. Sila si Ruffa Gutierrez, Dingdong Dantes, Boy Abunda ug Kris Aquino maoy hosts niini.

Kapamilya Fiesta

Milupad na kagahapon sa hapon ang Kapamilya stars alang sa ilang show sa Dubai. Lakip nila mao sila Chokoleit, Yeng Constantino, ug Angelica Panganiban.

Twitter ni Pacman

Duna nay Twitter account si Manny Pacquiao, diin tulo ka adlaw human niya kini gimugna, duna na siyay 10,000 followers.

Jen Operahan

 Operahan sa dili madugay sa tutonlan si Jennylyn Mercado gumikan sa gibaton niya nga tonsil. Ang nahisgutan nga operasyon, gitawag og tonsillectomy.

Sam Nagparamdam ni Julia

Giklaro ni Sam Concepcion nga nagkasuod sila ni Julia Montes gumikan sa programang Shout Out. Ang duha nagsaw-anay karon og tam-is nga mensahe saTwitter.

Danica Nagsabak

Dul-an na sa duha ka buwan nga nagsabak si Danica Sotto-Pingris alang sa ikaduhang anak nila sa iyang bana nga si Marc Pingris.

Wendell Kapatid Na

Katapusang taping na ni Wendell Ramos sa programang Bubble Gang sa milabay nga adlaw gumikan kay mobalhin na siya sa TV 5.

LJ is Back

Mipirma na og kontrata si LJ Reyes sa PPL Entertainment ni Perry Lansigan ug nagpamatoud kini nga hingpit na siya mobalik sa showbiz human sa taud-taud niya nga pagpakahilom gumikan sa pag-atiman niya sa anak nila ni Paulo Avelino.

Gloria mibalhin sa GMA

Human sa pipila ka dekada sa ABS-CBN, mibalhin na sa tugkaran sa GMA-7 ang beteranang aktres nga si Gloria Romero ug ang seryeng Cassandra maoy una niya nga proyekto sa bag-o niya nga mother network.

Gitangtang kay naghubo!

Gipalagpot sa Bb. Pilipinas Charities Inc. isip official candidates sa Bb. Pilipinas 2011 ang duha ka mga models nga sila si Grendel Alvarado ug Jenilyn Olivar.

Suma pa ni 2006 Bb. Pilipinas-World Anna Maris Igpit sa iyang text message sa Banat News Hugyaw kagahapon sa hapon, ang pagkatangtang sa duruha naggumikan kay napalgan sa BPCI ang hubo nga mga hulagway nila ni Grendel ug Jenilyn, diin giisip kini nga dakong kalapasan sa mga patakaran sa nahisgutang indigay sa kaanyag nga giisip nga labing prestihiyoso dinhi sa nasud.

Apan suma pa sa www.mykiru.blogspot.com ang maong mga hulagway kabahin sa challenge sa Philippines’ Next Top Model niadtong 2007, agig kampanya alang sa breast cancer awareness.

Si Grendel maoy midaog sa maong indigay, samtang si Jenilyn maoy 2nd Runner-Up.

Laing rason matud pa mao nga dunay existing contract si Grendel.

Ang Philippines’ Next Top Model kausa ra napahigayon dinhi sa Pilipinas ug gisalida sa RPN diin si Ruffa Gutierrez maoy host.

Samtang dili kini maoy labing unang higayon nga may natangtang nga kandidata sa Bb. Pilipinas. Niadtong 2009, ang model ug TV host nga si Sandra Seiffert napalagpot pud gikan sa maong indigay duha ka adlaw sa dili pa ang koronasyon, human nakit-an ang iyang swimsuit photos sa FHM October 2007 issue.

Human sa kontrobersiya, misalmot dayon si Sandra sa Miss Philippines Earth diin siya maoy nakoronahan sa maong tuig.