Sarah gihandum ni Angeline!

CEBU, Philippines - Karon nga mamahimo na siyang kabahin sa ASAP Rocks sugod karong Domingo, isip labing unang grand winner sa Star Power ni Sharon Cuneta, buot ni Angeline Quinto nga magkauban sila ni Sarah Geronimo.

Si Angeline kinsa mipildi nila ni Krissel Valdez ug Monica Sacay sa final showdown pinaagi sa score nga 90.88%, napildi kaniadto ni Sarah sa “Star for a Night” competition sa GMA-7 niadtong 2002.

Sa milabay nga tuig, first runner-up siya sa singing competition nga gipasiugdahan sa “Diz Is It” sa GMA-7 gihapon.

Lakip sa premyo ni Angeline mao ang P1 million grand prize, entertainment showcase, diamond jewelry set, 1-year managing contract sa Star Magic, ug brand new nga awto.

Karon nga naa na gyud siya sa showbiz, andam na matud pa siya nga atubangon ang tanang intriga.

"Alam ko naman na handa na ako sa mga mangyayari. Ang nilo-look forward ko po ay mga intriga takot po ako doon pero handa na po ako," nagkanayon siya.

Kung mahatagan og higayon sa natad sa arte, pangandoy niya nga ikapares si Aga Muhlach.

Samtang gipahibawo ni Sharon nga gawas kang Angeline, malakip na pud sa ASAP Rocks sila si Krissel, Monica, K-La, ug Akiko sugod karong Domingo.

Kim walay regalo ni Empress?

Nakatambong gyud diay si Kim Chiu sa debut party ni Empress Schuck nga gipahigayon sa Grand Terraces Commonwealth niadtong Domingo sa gabii.

Una na nga giklaro ni Empress sa iyang mga interviews nga walay siguro kung makatambong ba si Kim tungod kay may natanduan na kining proyekto nga natunong gyud sa adlaw sa iyang party.

Pero tsika sa kolumnista sa PangMasa, Vinia Vivar, nakaapil si Kim sa 18 Treasures ni Empress, pero wala kini gitunol nga regalo sama ni Andi Eigenman.

Pink gown with black lace nga mugna ni Pepsi Herrerra ang gisul-ob ni Empress, kinsa labihan matud pa ka maanyag samtang mikanaog sa hagdan, samtang giawitan ni Richard Poon og The Way You Look Tonight.

First ni Empress si Enchong Dee ug last dance ang papa sa debutant nga si Hans Schuck. Lakip sa misalmot sa 18 roses portion sila si Jake Cuenca, Dino Imperial, Robbie Domingo, Ejay Falcon, Felix Rocco, Matt Evans ug Angelo Patrimonio.

Lakip sa mihatag og treasures ang Churigogobaschu group nga si Melisa Ricks, Beauty Gonzales, Erich Gonzales ug Kitkat.

Majid the reluctant queen

“Always aim high and be determined, because God will reward you with the best.”

Kini maoy pamahayag sa 19 anyos nga si Majid Alza, ang Utanon Festival Queen sa lungsod sa Dalaguete, lalawigan sa Sugbo. Ang Hotel and Restaurant Management student sa Cebu Technological University-Argao Campus, nanghakot og awards sa milabay nga Utanon Festival nga gipahigayon dili pa lang dugay. Lakip sa iyang naangkon mao ang, Best Solo Performer, Best in Group Presentation, Best in Street Dancing, Best in Costume, First Runner-Up, Miss Photogenic, ug Miss Lecit-E Sexy Mind and Body.

Ang hugyaw kay kining maong dalaga nga lumad nga taga Argao, nagduha-duha pa gyud pagsalmot sa maong indigay, hangtud nga napugos na lang gyud siya tungod sa pagkumbinsi sa iyang maguwang ug handler. Gani, duha ka adlaw nga siya nga nagbansay-bansay sa iyang dance steps, tungod usab kay duna pa siya’y mga kaakohan sa iyang pagtuon.

Dihang mihukom na siya pagsalmot sa maong indigay, mituybo ang iyang kadasig nga mudaog, tungod usab sa mga tawo matud pa nga mi-menos sa iyang kapabilidad. Asoy ni Majid sa Banat Hugyaw kagahapon sa hapon, gi-underestimate matud pa siya sa uban tungod kay lagi dili siya makamao musayaw.

“Encourage pud ko aron i-prove gyud nako ngadto sa mga tawo nga sayop sila sa ilang pagtuo,” nagkanayon siya.

Maanyag, may gitas-on nga 5’4 ug maayo mutabi, ang Utanon Festival maoy ikaduhang indigay nga iyang nasalmutan. Ang una mao ang pagdaog usab niya isip Miss CTU-Argao, niadtong freshman pa lamang siya niadtong 2009. Pero giklaro na niya nga bisan pa man tuod og wala siya mapildi sa duha ka indigay sa kaanyag nga iyang nasalmutan, wala na siyay plano nga manimpad pa og laing beauty pageants. “Wala nakoy plano, dili man gyud na nako field. Tsamba ra to,” nagkanayon siya sa Banat News Hugyaw nga nagkatawa.

Dako ang pasalamat ni Majid ngadto sa mga tawo nga misuporta niya sa pinansyal nga aspeto tungod kay niya pa, wala gyud silay kwarta ug nagdepende sa sponsors. Mipasalamat pud siya sa iyang mga higala ug classmates nga niya pa misalig ug kumbinsido gyud sa iyang kapabilidad, ug sa iyang pamilya nga kanunay’ng anaa aron paghatag og inspirasyon.

Ug alang niadtong mga tawo nga mi-underestimate niya, adunay mensahi si Majid. “Before mo mu-judge og laing tawo, dapat dili mo mu-look down og laing tawo bisan wala mo kahibaw og unsa ug kinsa nang tawhana.

Ang Utanon Festival gipahigayon agig pagsaulog sa ika-300 nga tuig sa pagkatukod sa simbahan sa Dalaguete…