Erap ipinagbibili na ang mansion

Malapit nang mag-goodbye sa ere ang Koreana kaya nagpatawag ng presscon ang GMA 7 para sa cast ng kanilang afternoon drama show.

Ang Koreana ang isa sa mga successful shows ng Kapuso Network. Mataas ang ratings ng show at napatunayan ni Kris Bernal na makaka-survive siya kahit walang ka-loveteam. Hindi mababakante si Kris dahil mawala man ang Koreana, mapapanood siya sa Machete.

Umaasa ang mga fans ni Kris na makatutulong ito sa Machete dahil matagal-tagal na rin mula nang mapanood sa TV ang loveteam nila ni Aljur Abrenica.

* * *

Ang aga ng pagpasok ng summer ha? Ang init-init na ng panahon kaya marami na ang nagpaplano na pumunta sa beach.

Nauna nang pumunta sa Boracay noong Sabado ang cast ng Tween Hearts dahil doon ang location ng kanilang taping.

Mataas ang ratings ng Tween Hearts at bilang treat sa mga bagets, pumayag ang GMA 7 na mag-taping sila sa Boracay. Hindi nanghihinayang ang network na gastusan ang mga shows na pumapalo ng husto sa ratings.

* * *

Hindi ang buhay ni Gen. Emilio Aguinaldo ang iniisip ni Sen. Bong Revilla, Jr. na isalin sa pelikula.

Ibang project ang binabalak ni Bong at kung matutuloy ito, si Joel Lamangan ang posibleng mamahala sa pelikula, na tungkol din sa buhay ng isang kilalang Filipino hero.

Kung matutuloy ang plano, isasali sa Metro Manila Film Festival sa darating na December ang pelikula na gagastusan ng husto ni Sen. Bong.

* * *

Masyadong conscious sa harap ng camera ang aktor na mahilig sa libreng publicity.

Acting na acting ang aktor, kahit wala sa harap ng TV camera at pati ang kilos niya, de numero rin.

Heto na ang nakakalokang parte, hindi napansin ang participation ng aktor sa isang pelikula, kesehodang nagpaka-trying hard siya. Hindi nagtagumpay ang aktor na mapuna ng mga fans na ayaw sa mga artista na trying hard at feeling sikat.

* * *

Nalimutan ko na may isyu sa pagitan nina Annabelle Rama at Kris Aquino. Nagtaka pa ako nang marinig ko ang balita na nagkabati sila nang magkita sa birthday party ni Sen. Jinggoy Estrada noong Sabado.

May nag-remind lang sa akin sa nangyari noon nang umalis si Ruffa Gutierrez sa set ng The Buzz dahil hindi na niya ma-take ang mga pambabara ni Kris na ikinaimbyerna ni Bisaya.

Ang say ng mga witnesses, si Kris ang unang lumapit at bumati kay Annabelle at sa mister nito na si Eddie Gutierrez. Tama ang ginawa ni Kris na siya ang unang bumati dahil pagpapakita ito ng respeto sa mga nakatatanda sa kanya.

* * *

Invited ako sa birthday party ni Sen. Jinggoy pero hindi na ako pumunta dahil umuwi na ako pagkatapos ng Startalk.

Nabalitaan ko na lang ang mga sidelights mula sa mga dumalo sa kanyang birthday celebration na ginanap sa roof deck ng condo building na pag-aari ni Papa Erap Estrada. Ito ’yung condo building sa Shaw Boulevard na lilipatan ni Papa Erap at ng kanyang pamilya kapag nabenta na ang mansion nila sa Greenhills.

Maganda ang condo building na napuntahan ko dahil doon nag-celebrate ng birthday si Lorna Tolentino noong December. Mahirap makapasok sa condo building ni Papa Erap dahil mahigpit ang mga security guards nila.