Fretziecians nagkadaghan, nagkalig-on!

CEBU, Philippines - Mukabat na ngadto sa 20,000 ka mga tawo ang nagpasakop  sa  Solid Fretziecians, o ang mga tawo nga miidolo sa garbo sa Sugbo nga si Fretzie Bercede.

Ang mga opisyales sa maong fans club  nagtapok sa panimalay ni Frezie sa milabay nga gabii diha sa Mandaue City.

“Daghan gyud kaayo og salamat  sa mga taga Cebu, tungod ninyo maong nasulod ko sa showbiz,” suma pa ni Fretzie dinhi sa Banat Hugyaw.

Dugang pa niya nga nagbaha usab  ang iyang mga fans didto sa kaulohan, gani permi kini magpaabot kaniya human sa programa niya nga Shoutout sa ABS-CBN.

Gawas sa Solid Fretziecians, aduna pu’y naumol karon nga “Bretzie Fans Cub” ug “ Vanzie Fans Club”.

Aminado si Fretzie nga nabahin ang iyang fans kay dunay miingon nga mas angayan siya ipares kang Ivan Dorschner, apan ang uban moingon pud nga mas pareson sila ni Bret Jackson.

Apan giklaro niya nga nagdepende ra gyud kining tanan sa plano sa ABS-CBN management, sanglit igo ra siya modawat kung unsay ihatag nga project ngadto kaniya.

Napuno sa pagdayeg si Fretzie gumikan kay motagad gyud siya sa iyang fans ug todo suporta usab ang iyang mga ginikanan nga sila si Dr. Dante ug Kim Bercede ngadto sa fans club.

Nagpadayon karon ang pagtambong ni Fretzie sa nagkadaiyang workshop isip preparasyon sa mga umaabot niya nga proyekto sa ABS-CBN.