Toslob sa Oslob 2010: Giharos sa usa ka contingent!

CEBU, Philippines -  “To dip” or “to soak” mao ang iningles sa “toslob”. Dinhi naggikan ang Toslob Festival sa lungsod sa Oslob. Suma pa sa karaang istorya nga dihay magtiayon nga nagpalandong sa dakung kahoy nga gitawag og “nigad” (mao usab kini ang karaang ngan sa Oslob kaniadto). Ang magtiayong nagpalandong sa kahoy, nangaon og nilung-ag nga saging ug gi-toslob sa suka ug asin. Atol usab nga adunay mga Katsila nga miagi ug nangutana kanila kun unsay pangan sa maong lugar, wala sila magkasinabtanay—ang magtiayon nagtuo nga gipangutana sila og nag-unsa sila, hinungdan nga ilang gitubag og “toslob.”

Samtang tradisyon na sa mga Oslobanons nga magbaton og sawsawan o sauce kauban sa ilang mga pagkaon.

Ang Toslob Festival ipahigayon matag ikaduhang Domingo sa buwan sa Disyembre atol sa kapistahan sa patrona sa maong lungsod nga mao ang Immaculada Concepcion.

Duha na ka tuig ang Toslob Festival sa Oslob, isip hulip sa kaniadto Sadsad Festival. Nahimong mas mabulokon ang Toslob Festival 2010 tungod usab sa pag-abag na sa banggiitang event director dinhi sa Sugbo nga si Hercules “Boboy” Cebalosa.

Gihulga man tuod og uwan, apan malampuson nga napahigayon ang maong festival, samtang ang among grupo nagpasilong sa harianong panimalay sa inilang kolumnista (ug akong idol) nga si Roger Serna, aron mamista ug mag-videoke.

Samtang nabasa man tuod, maabtikon nga mi-cover ang Sugbo TV crew sa maong kalihukan. Kauban ang among cameraman si John Rey “Tanjay” Tanjusay, gisuhid namo ang kadalanan nga maoy gitadlas sa mga contingents, hangtud nga misangko na didto sa church ground sa Oslob alang sa “Panagtiging Ritwal.” Ang host sa programang “Mabuhi ka Sugbuanon” sa Sugbo TV nga si Vince Escario mao puy master of ceremony sa nahisgutang festival.

Sa walo ka mga contingents, nauyonan sa mga hurado—nga gilangkuban sa mga lig-ong dancers ug choreographers nga sila si Marti Ybañez, Oliver Figueroa ug Angel Manapsal—ang Tribu Masaulogon nga gi-abagan sa clustered barangays sa Nueva Caceres, Gawi ug Pungtod. Kumbinsido pud ang mga nanan-aw sa hukom sa mga hurado.

Tungod niini, ang nahisgutang contingent pud ang automatic nga natudlo isip Best in Choreography ug Best Choreographer ngadto sa nagbansay nila. Dungan niini, giharos pud sa Tribu Masaulogon ang minor awards sama sa Best in Street Dancing, Best in Costume ug Best in Andas.

Daghang salamat sa tanang mga Oslobanons ilabi na ang ilang mga kugihan nga municipal officials lead by Mayor Ronald L. Guaren, Vice-Mayor Jose C. Tumulak Jr ug sa tanang sakop sa Sangguniang Bayan sa Oslob. Ang mga Production In-Charge nga sila si Hon. Vivien Rivera, Mrs. Elizabeth Benologa, Engr. Em-em Frondoso, Engr. Jerry Angana ug Amor Laveste, angay pud pahalipayan sa maong kalampusan. Dili usab naku makalimtan ang mga abtik nga Production Staff ni sir Boboy nga sila si Diouard Pono, Eric Francis Undang, Edu Quisido, Kerk Kian Dayon ug Wing Cimafranca.

Hangtud sa sunod Toslob Festival!