Miss Cebu 2011 "Iskolar ng Bayan" ang nakoronahan

CEBU, Philippines - Kulbahinam ug napuno sa kasadya ang Grand Coronation Night sa Miss Cebu 2011  niadtong Miyerkules sa gabii diha sa Waterfront Hotel and Casino-Lahug.

Ang tinun-an sa kursong mass communication sa University of the Philippines-Cebu nga si Mia Zeeba Faridon ang malampusong milangkat sa titulo.

Aminado si Mia nga labihan ka lig-on ang tanang contestants, busa nakugang siya pag-ayo sa dihang natuboy siya sa maong kadaugan.

“Salamat kaayo sa tanang misuporta kanako labi na sa akong mga friends ug sa akong family,” nagkanayon si Mia.

Sa unang hugna sa question and answer portion, ang mga pangutana nagikan ra usab sa 12 finalists.

Pag-abot sa Top 5, nakigkombate ang lima ka finalists sa usa lang ka pangutana  nga mugna sa mga hurado.   

Ang pagpabilin sa positibong karakter sa mga Sugbuanon ug pagpaambit sa maayo  niya nga mga idea maoy usa sa mga pamaagi sa pag-ugmad sa atong nasud. Kini maoy unod sa tubag ni Mia kabahin sa pangutana unsaon sa usa ka Cebuana sama niya nga makatabang sa nation building.

“As a mass communication student, the most effective communication tool is through the word of mouth. I will use my knowledge and my recognition to spread the word, keeping my value and confidence in helping build a stronger nation. It starts as a Cebuana and as a Filipino,” lenggua niya nga mi-ani og kusog nga pakpak.

Nakaangkon usab og titulo  sila si Teffanie Lene Llamada (1st runner-up), Vanessa Claudine Ammann (2nd runner-up), Rosemary Gore (3rd runner-up) ug Aiko Lene Serrano (4th runner-up).

Ang  labing unang Miss Cebu (1984) nga si Janice Bañez Minor maoy nagdesinyo sa korona sa napili nga  rayna karong tuiga.

Gawas sa cash ug mga gift certificates,  ang nasulod sa Top 5  makaangkon usab og libreng biyahe  paingon sa Hongkong.

Si Mia usab ang  natuboy nga  Kapamilya Star of the Night   ug mismo ang Kapamilya star ug Sugbuanong si Matteo Guidicelli  maoy mipahibawo niini.

Sa samang higayon, host usab si Matteo kauban sila si Miss Cebu 2008 Sian Maynard ug Miss  Cebu  Tourism 1999 Menchu Antigua .

Samtang si Teffanie nga maoy  usa sa  giisip nga crowd favorite maoy midaog sa Best Gown award ug nalangkat usab ni  Vanessa ang  Miss Friendship award.

Ang maanyag nga si  Katrina Raye Yuson maoy nahimong  Miss Photogenic ug napili nga Best Designer si    Philip  Tampus kinsa maoy nagmugna sa mga gipangsul-ob sa  kandidata  nga si  Katrina Jane Esmas.

Daghan usab ang nahugyaw sa   Chinese-inspired production number  gumikan sa modern Chinese attire nga gipanul-ob sa mga kandidata, nga haom kaayo sa tema sa Sinulog 2011.

Mihatag usab sa hugyaw nga production  numbers sa maong show ang  kanhi mga finalists sa Pilipinas Got Talent nga sila si Allan “Alakim” dela Paz nga mipakita sa hugyaw niya  nga magic  ug  si Markki Stroem nga nakapaabiba sa  audience gumikan  sa hugyaw niya nga pag-awit sa “Beautiful World” ug  “Broken Vow.”

Ang mga kanhi  mananaug sa Miss Cebu sa miaging  tuig  nga gipangulohan ni Reena Malinao  maoy midalit og opening number.

“Deserving kaayo si Mia,  nalipay ko alang niya ug masaligon ko  nga iyang mapadayon ang pag-promote sa Cebu,” suma pa ni Reena sa dihang nahinabi sa Banat Hugyaw.

Ang pipila  ka mga opisyales sa dakbayan sa Sugbo nga gipangulohan ni Mayor Michael Rama maoy mitunol sa pasidungog ngadto sa mga mananaog.