Eula nakakilala ng bente anyos

MANILA, Philippines - Makaraang gumanap bilang Doña Adela sa critically-acclaimed movie na Rosario, balik-akting si Eula Valdez sa telebisyon sa latest episode ng Untold Stories na Sa Dulo ng Kahapon ngayong Huwebes ng gabi (Enero 13).

Mula sa isang kontrobersiyal na Face to Face episode tungkol sa babaeng naghahanap ng respeto at pagmamahal sa kabila ng mapait na nakaraan, bibigyang-katauhan ng award-winning actress si Betbet na na-involve naman sa love triangle sa pagitan ng kanyang karelasyong lalaki at sa bading niyang best friend.

Matapos maging sex worker sa Cyprus sa murang edad, nagbalik ng bansa si Betbet sa pag-asang may magandang buhay na naghihintay sa kanya. Lumipas ang tatlong bigong pakiki­pag-relasyon, nalulong siya sa alak at depresyon hanggang sa humantong sa pamimigay ng sarili niyang anak. Kung kailan naman lugmok na lugmok si Betbet, nakilala niya ang bente anyos na si Darius (gagampanan ni Neil Coleta aka Nicos mula sa hit iced tea TV commercial). Tuluyan na bang matutuldukan ng May-December romance nila ang malungkot na kahapon ni Betbet?

Kasama rin sa cast sina Carlo Cannu, Allan Paule, Carlos Morales, at Bella Flores. Huwag palalampasin ang kaabang-abang na episode sa direksiyon ni Argel Joseph at sa panulat ni Abet Raz ngayong Huwebes pagkatapos ng Willing Willie sa Primetime Panalo ng TV5.