US record label na nagdemanda kay Manny umurong

Nabawasan ang problema ni Manny Pacquiao dahil iniurong na ang breach of contract case na nagkakahalaga ng US$10 million na isinampa laban sa kanya ng isang US record label.

Nagdemanda ang RBG Group noong November 2010 dahil hindi umano nakatupad si Manny sa usapan na magre-record siya ng dalawang kanta matapos makatanggap ng downpayment na US$40,000.

Kumuha si Manny ng American lawyer na magtatanggol sa kanya. Maganda ang naging ending dahil nagpasya ang nagdemanda na iatras ang kaso laban sa Pambansang Kamao.

*     *     *

Pinagbigyan ng staff ng mga showbiz talk shows ang pakiusap ng pamilya ni Alfred Vargas na hayaan na lamang sila na magluksa ng pribado.

Namatay noong Martes ng gabi ang tatay ni Alfred na kapangalan niya at nang kumalat ang balita, ni-request ng staff ng mga showbiz talk shows na interbyuhin siya at kunan ang burol ng kanyang ama.

Hindi sanay sa showbiz ang pamilya ni Alfred at naintindihan ng showbiz media ang kanilang sitwasyon.

Cardiac arrest ang ikinamatay ni Mr. Alfredo “Freddie” Vargas sa St. Luke’s Medical Center at bukas ang tentative date ng kanyang libing sa public cemetery ng Sta. Maria, Bulacan. Nakikiramay uli ako sa naulilang pamilya ni Mr. Vargas.

*     *     *

Mamaya ang huling gabi sa TV ng Grazilda ni Glaiza de Castro. Tiyak na mami-miss ni Glaiza ang show na nagbigay sa kanya ng malaking chance na maging bida.

Ang say ni Marian Domingo ng GMA Corporate Communications, makapigil-hininga ang mga eksena ng pagtatapos ng Grazilda kaya hindi ito dapat palampasin ng mga manonood.

*     *     *

Friends na uli sina Mark Herras at Gene Padilla dahil nagkabati sila nang magkita sa GMA 7 compound.

Nagkaroon noon ng misunderstanding ang dalawa dahil sa isyu ng balato. Nag-sorry na si Gene kay Mark pero nang hingan siya ng Tweetbiz ng message, idinamay pa niya ako.

Huwag pasaway kay Nay Lolit ang message ni Gene para kay Mark as in ginaya niya ang pag-i-emote ko noon kina Mark at Nadia Montenegro kaya natawa ako.

*     *     *

Tapos na ang shooting ng Si Agimat at Si Enteng Kabisote at naipalabas na ito sa mga sinehan pero hindi pa tapos ang mga tsismis tungkol kina Vic Sotto at Gwen Zamora.

Lucky newcomer si Gwen dahil sikat na artista ang nali-link sa kanya. Nakikilala na si Gwen ng mga tao dahil sa mga tsismis na siya ang bagong pag-ibig ni Bossing.

Loveless ngayon si Bossing dahil hiwalay na sila ni Pia Guanio kaya inili-link na siya sa ibang mga babae.

*     *     *

Timing ang telecast ng Dwarfina sa Lunes dahil showing sa mga sinehan ang bagong version ng Gulliver’s Travels.

Tungkol sa mga maliliit na tao ang kuwento ng Gulliver’s Travels at ganoon din ang plot ng Dwarfina.

Umpisa pa lang ng 2011 pero mga duwende at maliliit na tao ang uso na palabas. Ito kaya ang maging trend sa Year of the Rabbit?

*     *     *

Kahapon ang opisyal na pagtatapos ng Kapaskuhan kaya puwede ko nang pasalamatan ang lahat ng mga nagpadala sa akin ng mga Christmas gifts.

Maraming salamat sa mga nakaalaala. Hindi ko na iisa-isahin ang inyong mga pangalan dahil baka magkulang ang espasyo. Maraming salamat at isang masaganang 2011 ang wish ko para sa ating lahat!