Akiko Solon's Journey

CEBU, Philippines - Gihulagway ni Akiko Solon nga usa ka dakong hagit kaniya ang pagkalakip niya karon sa Star Power sa ABS-CBN gumikan kay siya na lang ang nag-inusara nga Sugbuanon busa todo na ang iyang paningkamot aron makalangkat og lain na pud nga garbo alang sa Sugbo.

Karong adlawa, mag-motorcade si Akiko nga mutadlas sa mga dagkong dalan sa Lapu-Lapu City, Mandaue ug Cebu City gumikan kay gusto niya nga mahimamat ang mga Sugbuanon nga nagsuporta niya sukad pa lang sa pagsugod sa Star Power.

“Buhaton gyud nako ang tanan, ug salamat kaayo sa tanan nga taga-Cebu basta kini ang akong gibuhat karon kay para jud ni ninyo,” nagkanayon si Akiko sa exclusive interview sa Banat News Hugyaw kagahapon.

Ang 16 anyos nga si Akiko misaysay nga usa sa maisip niya nga lig-on nga katigi mao si K-La .

“Powerful kaayo siya (K-La) og voice; basta buhaton gyud nako ang akong best ,” dugang pa ni Akiko.

Paambit pa niya nga sa panahon nga mutungtong na siya sa entablado aron mukanta tugkaron gyud niya ang lyrics aron matagaan niya kini sa tukma nga kinabuhi.

Bata pa lang si Akiko ganahan na siya mukanta ug usa sa iyang idolo ang pop princess nga si Sarah Geronimo.

Tataw nga dunay kaugmaon si Akiko sa showbiz ug gusto gyud niya nga mabansay og maayo hinungdan nga iya gyud nga atubangon ang tanang hagit nga iyang masugatan sa Star Power.

Nalipay usab siya nga iyang nakita sa personal si Sharon Cuneta kinsa maisip niya nga usa sa mga rason nga inanay na siya nga nakasulod sa kalibutan sa showbiz.

Love songs man o RnB, mahimong kantahon ni Akiko busa makadawat siya kanunay og mga positibong reaksyon gikan sa mga hurado sa maong show.

Aminado si Akiko nga ubay-ubay na nga mga Sugbuanon ang misikat didto sa kaulohan gumikan sa talento nila sa pagkanta ug usa kini sa nagtukmod kaniya nga   lig-onon gyud niya og maayo ang iyang kaugalingon sa pag-atubang og mga challenges.

Si Akiko, unang namatala diri sa Banat News Hugyaw human siya midaog sa Josenians Got Talent competition sa University of San Jose-Recoletos niadtong Agosto, diin usab siya mikuha og kursong Mass Communication. Pero gumikan sa nagpadayon nga reality search, miundang una si Akiko, kinsa lumad nga taga Maribago, Lapu-Lapu City…

Tulo sila ka magsuon ug siya ang kinamanghoran. Suma pa niya mahiligon usab og musika ang iyang amahan ug mao kini ang nagsilbi niya nga mentor.

Usa ka insurance agent ang inahan ni Akiko samtang ang iyang amahan maoy nagdumala sa ilang karenderya.

Gihimakak usab ni Akiko nga ang intriga nga matud pa gikan siya sa adunahan nga pamilya.

“Dili mi dato uy, may kaya lang tingale (average),” panapos pa niya. (BANAT NEWS)