Susan Fuentes dihang mibalik ang rayna

CEBU, Philippines - Ang beteranang singer nga si Susan Fuentes nga naila sa music industry niadtong dekada 70 migahin sa iyahang panahon sa pagbisita sa Sugbo human kini midalit og kanta atol sa paglusad sa libro ni Dr. Jose “Dodong” Gullas nga “To Never Forget,” niadtong milabay nga Domingo.

Nasayran nga ang magtiayong Dodong ug Nena Gullas ang naningkamot nga makit-an pagbalik si Susan sukad pa niadtong Enero, sa tuyo ug tumong nga malakip kini sa mapasidunggan nga mga Bisaya nga nakahatag og dungog sa natad sa musika.

Si Susan Fuentes Toyogon sa tinuod nga kinabuhi lumad nga taga Butuan, Agusan del Norte. Siya ang mipasikat sa mga kanta nga Miss Kita Kung Christmas, Usahay, Rosas Pandan Medley, Ang Pipit, Sa Kabukiran ug daghan pang mga awit nga hangtod karon padayon pa nga gipaminaw sa publiko.

Kadungan niya sa pagsikat sila si Pilita Corales, Eva Eugenio, Imelda Papin ug Dulce. Nagsugod sa Gem Recording si Susan human siya makaplagi sa banay nga Ayala didto sa Davao City. Tungod sa Gem Recording namugna ang Visayan Recording nga maoy mipaila sa mga Visayan songs, diin ang target market niini mao ang Visayas ug Mindanao. “Ang tanang nahitabo sa akong kinabuhi, grasya na ni Lord,” nagkanayon si Susan Fuentes sa dihang nakauban sa Banat News Hugyaw ug The Freeman Newspaper sa usa ka intimate interview niadtong Miyerkules sa hapon diha sa University of the Visayas, sa buhatan mismo ni Gullas. Gibutyag sa singer nga nakuha niya ang iyahang gasa sa pagkanta sa iyahang mga ginikanan tungod kay mga music lovers ang mga nahisgutan. Ang 56 anyos nga diva nagsugod sa pagkanta dihang nag-edad pa siya og singko anyos diin ang paborito niyang kantahon mao ang kanta nga “Diana”. Ikaupat siya sa lima ka managsuon ug karon aduna na siya’y duha ka anak pero dili siya kasado.

Ang nagpa-bantogan gayud kang Susan mao ang iyahang kanta nga Usahay diin nakaangkon siya og Gold record niini sa Gem ug gikuronahan siya isip Queen of Visayan Songs. Sulod sa kasikatan ni Susan sa industriya kalit lang kining nawala sa spotlight niadtong 1990’s. Unsay nahitabo?

“It was a long story. Ni-underwent ko og kidney transplant and I had four major operations. Nagkasakit-sakit ko and had family problems also but I started up and recovered. Si Jesus ra gyud!” Giangkon niya nga gimingaw na siya sa pagkanta. “Siyempre na miss gyud. Namiss gyud nako ang singing career nako kay daghan ang nahitabo nga mga trials and testings pero by God’s grace nakarecover ra gyud ko.”

“Ang turning point sa akong life katong time nga nawala na tanan sa ako. Lahi gyud akong kinabuhi sa una nga daghan kaayo ko og kwarta. Sa una mora ko og queen pero gipaagi gyud sa Ginoo nga ma-surpass tanan nako nga mga trials. Sa una wala ko ni Lord, karon naa nako ni Lord,” maka-huluganong mga pulong ni Susan.

Dihang gipangutana siya kung mobalik pa ba siya sa industriya, madasigon kining mitubag. “Mobalik gyud ko sa pagkanta kay mao gyud na ang gihatag Niya nga talent nako. Well, kung naay offer nga mobalik sa recording, why not? Basta si Lord ang bahala nako.”

Nasayran nga nakamugna si Susan og walo ka albums kaniadto---pito ang Bisaya, usa ang English. Pagkakaron gipunting niya ang iyang panahon sa paghimaya ug pag-alagad sa Ginoo pinaagi sa pagkanta sa usa ka church didto sa Manila.

Dungan niini, naghinamhinam na siya sa gilaraw nga Awit Binisaya Concert kauban sila si Pilita, Dulce ug Max Surban alang sa pagpadayag sa kulturang Pilipinhon pinaagi sa Binisaya nga mga awit.