Bayan Mo iPatrol Mo may kakaibang kampanya sa Pasko
MANILA, Philippines – Ang pagtulong at pagpapasaya sa kapwa ngayong Kapaskuhan ay hindi lamang sa pamamagitan ng pera, mga lumang damit, o kagamitan. Maaari rin itong gawin sa pamamagitan ng paglalaan ng inyong oras, talento, o lakas basta ba bukal ito sa kalooban.
Ibahagi na ang tunay na diwa ng Pasko at ipagpatuloy ang pagsagot sa tawag ng pagbabago sa inyong sariling pamamaraan sa naiibang kampanya ng ABS-CBN News and Current Affairs’ Bayan Mo iPatrol Mo ngayong Disyembre, ang Pasko ng Pagbabago.
Hinihimok nito ang mga aktibong bayan patroller na magpakita ng malasakit sa ibang tao, grupo ng tao, o maging isang komunidad tulad ng boluntaryong pagsisilbi bilang mga tagapag-pasaya ng mga ulilang matatanda o bata, pamamahagi ng pagkain o laruan, paglilinis ng estero at kanal, pagtatanim ng puno, pagtuturo sa mga batang lansangan, at iba pang puwedeng magawa na magbibigay pag-asa sa kapwa.
Ipagbigay alam lamang ang inyong good deed sa BMPM sa pamamagitan ng pagpapadala ng e-mail sa [email protected] o pagte-text ng IREPORT<space>pangalan<space>address<space>kasarian<space>ang inyong mensahe sa 2366.
Ang aktibidad na mapipili ay may pagkakataong maipalabas sa Umagang Kay Ganda at TV Patrol ng ABS-CBN at sa ANC kasama ang ilang ABS-CBN anchors.
Siguraduhin lamang kumpleto ang detalye ng inyong suhestiyon tulad ng ilan kayong kasali sa aktibidad, saan at kailan ito mangyayari, at ano ang positibong epekto nito sa komunidad na inyong pagsisilbihan.
Para sa karagdagang impormasyon pumunta lamang sa http://bmpm.abs-cbnnews.com
- Latest
