Denise tua na sa Amerika!

CEBU, Philippines - Taliwala sa mga intriga nga mabdos siya tua na gyud diay karon sa Amerika si Denise Laurel. Kini maoy chika sa showbiz anchor sa DZRH nga si Tita Swarding kinsa mibalita sa OkRyan sa dyRC 648 khz., kagahapon sa buntag.

Gibakwi ni Tita Swarding ang una niyang tsika nga mubalik pa si Denise sa teleseryeng Kristine, diin pamabdosan siya sa character pud ni Rafael Rosell, nga matud pa naa sa istorya.

Matud ni Tita Swarding tua na gyud sa Amerika si Denise busa dili na matino unsa gyud katinuod ang taho nga mabdos ang dalaga ug ang PBA player boyfriend niini maoy amahan.

Samtang sa programang Juicy nila ni Cristy Fermin giingong mipadala og mensahe ang iyaan ni Denise ug mibutyag nga mihawa ang iyang pag-umangkon sa maong teleserye tungod kay wala na kini makauyon nga matud pa mas paseksihon pa gyud ang iyang character.

Kahinumduman nga sa pagbisita ni Denise ug Rafael sa Sugbo niadtong Oktubre isip celebrity guests sa Gaisano Main ug Country Mall, namulong siya nga dili na matud pa siya magpa-sexy.

Suma pa niya nga kung nagpa-sexy man gani siya sa men’s magazine kaniadto ug medyo sexy ang iyang character sa Kristine, dili na kini niya palabwan o dugangan tungod kay naghandom siya nga makabaton og pamilya ug dili siya buot nga makaingon ang iyang umaabot nga mga anak nga bomba star ang ilang mama.

Atol sa maong pagbisita usab ni Denise sa Sugbo gibutyag niya nga sa higayon nga matapos na ang Kristine karong Pebrero sunod tuig, mulupad siya paingon sa Amerika aron mukuha og short term course sa Julliard School sa New York nga ilado kaayong performing arts conservatory.

Pyramid nisidlak sa Yahoo

Nahimutang sa ika-upat nga puwesto ang awit ni Charice Pempengco nga “Pyramid” sa Top 10 sa Most Irresistible Lyrics sa “Yahoo’s 2010 Year in Review”. Ang ubang kanta nga nalakip sa maong listahan ,naglangkob sa “Baby,”(Justin Bieber ) “Love the Way You Lie” (Eminem) “Bad Romance” (Lady Gaga) , “Just the Way You Are”( Bruno Mars), “Tik Tok”(Kesha),. “Solo”( Iyaz ), “Two Is Better Than One”( Boys Like Girls) ,“Hey Soul Sister”( Train) ug “Fireflies” (Owl City).

“Maria La Del Barrio”

Sila si Erich Gonzales ug Enchong Dee maoy mga bida sa Pinoy adaptation sa Mexican series nga “Maria La Del Barrio”   nga unang gidala kaniadto sa sikat nga aktres nga si Thalia. 

Ikaupat na kini nga higayon nga mag-uban sa usa ka serye sila si Enchong ug Erich. Ang duha nagpares na kaniadto sa Katorse, Tanging Yaman ug Magkaribal.   

Iza type ni Mark

Gipadayag ni Mark Bautista nga crush gyud niya ang Kapuso actress nga si Iza Calzado. Aminado ang singer nga aduna na’y boyfriend si Iza busa wala siya’y plano nga modiskarte niini. Suma pa ni Mark nga nagkaila-ila sila ni Iza pinaagi sa ilang common friends ug saludo siya sa kaanyag niini .

Shalani gipangulitawhan ni Willie

Samtang gihimakak sa higala ni Shalani Soledad ang isyu nga matud pa nga dunay espesyal nga relasyon ang iyang higala ngadto kang Willie Revillame.

Dili tinuod ang intriga nga matud pa engaged na ang duha.

Samtang ang iyaan ni Shalani nga si Baby mipadayag nga   nangulitawo pa lang si Willie sa iyang pag-umangkon busa dili tinuod ang tsika nga nagkauyab na ang duha.

Maja ug Ejay naghawok

Wala katunga si Maja Salvador sa presscon sa pelikulang Father Jejemon sa miaging adlaw. Matud pa nga masaksihan sa maong pelikula ang init nga kissing scene nila ni Ejay Falcon. Giingong daghan na ang nag-atang niini gumikan kay una kini nga higayon mag-uban ang duha sa usa ka init nga eksena.

Willing Willie palamboon

Mitumaw karong hungihong nga matud pa nagplano karon ang mga tawo likod sa TV show nga Willing Willie sa TV 5 nga mohimo og hugyaw nga mga segment aron monindot og samot ang maong show. Gumikan niini migawas ang mga pagduda sa mga himantayon nga basin   mao kini ang move sa maong programa gumikan kay permi maglawig ang kaatbang nila sa timeslot nga naglangkob sa mga news program.

MagTV ug KMWK gipasidunggan!

Malipayong gipahibawo ni Bonding Adrian Diongzon sa Banat News Hugyaw kagahapon nga nakadawat og Anak TV Seal ang mga ABS-CBN’ shows nga Kapamilya Mas Winner Ka (KMWK), ug Mag TV Na!

Ang KMWK nga makita matag Sabado, 9:30 sa buntag giduma nila ni Roy Empleo, Kat Ross ug Christine Fernandez, kauban pud sila si Monica ug Vanessa. Samtang ang MagTV Na!, makita matag Domingo, 8:30-9:30 sa buntag, diin hosts sila si Blinky, Borgie, Phoebe, ug Dan Harry.

Suma pa ni Bonding Adrian , mikabat ngadto sa tres mil ang jurors nga maoy mipili sa 91 ka TV shows gikan sa tibuok Pilipinas nga giila isip Anak TV Seal awardees.

Ang awarding gipahigayon kagahapon sa buntag didto sa Soka Gakkai Auditorium sa Quezon, City.

Kahinumduman nga nakadawat usab og susama nga pasidungog ang Maayong Buntag Kapamilya, ang early morning show sa ABS-CBN Cebu nga gidumala nila ni Vilma Andales, Cathy Gabronino-Ayaay, ug Rico Lucena, sa milabay nga tuig.

Ang anak TV Seal Award gipasiugdahan sa Southeast Asian Foundation for Children and Television nga nagtinguha pagpasidungog niadtong “ kid-friendly TV personalities and programs. Ang pag-ila niadtong haom pasidunggan pinasikad sa usa ka survey diin mga bata ang respondents.