Angelica nakakita na sa amahan

CEBU, Philippines - Nahimamat na gyud og balik ni Angelica Panganiban ang iyang amahan didto sa Amerika. Matud pa nga dos anyos pa lang siya sa dihang nagkabuwag ang iyang mga ginikanan hinungdan wala na gyud sila magkita sa iyang amahan sukad sa maong hitabo. Maabot karong adlawa si Angelica dinhi sa Pilipinas ug isaysay niya ang kinatibuk-ang istorya niini sa The Buzz karong Domingo.

TV 5 naglawig

Suma pa sa taho nga gimantala sa PEP, naglawig ang TV5 sa weekend primetime race niadtong Nobyembre 27 (Sabado) ug Nobyembre 28 (Domingo). Base sa overnight Individual ratings sa AGB Nielsen sa Mega Manila households, ang TV5 nakaangkon og 33.5% audience share samtang ang GMA-7 nakakuha lang og 27.6% ug ang ABS-CBN nakahipos og 22.3%. Samtang ang resulta niadtong Domingo naglangkob sa TV5 ( 30.9%), GMA-7 (28.4% ) ug ABS-CBN (19.3% ).

My Amnesia Girl mikita og P43.86M

Mikita og P43.86 million ang pelikula nila ni Toni Gonzaga ug John Lloyd Cruz nga My Amnesia Girl sa lima pa lang ka adlaw nga pagpasalida niini sa mga sinehan. Nahimutang ang maong pelikula sa ikaduhang puwesto sa Box Office Mojo ug nakatigi niini ang Harry Potter and the Deathly Hallows Part 1.

Piolo dunay coffee table book

Gilusad na niadtong Martes sa gabii ang coffee table book ni Piolo Pascual nga nag-ulohan og “Piolo Revealed”. Mga hulagway sa aktor maoy unod niini nga kuha sa banggiitang photographer nga si Raymund Isaac.Pipila sa mga mitambong sa launching sa coffee table book ni Piolo mao sila si Gretchen Barretto, Johnny Manahan, ABS-CBN President Charo Santos-Concio, Ervic Vijandre, Moi Bien, Director Joyce Bernal, Dra. Vicki Belo, ug Crystal Henares.