Lovi Poe delikado sa bird flu

Si Lovi Poe ang pumasok sa isip ko nang mabalitaan ko na uso na naman ang bird flu sa Hong Kong dahil tag-lamig na naman sa bansa na kinaroroonan ng kanyang boyfriend na si Congressman Ronald Singson.

Regular na pumupunta sa Hong Kong si Lovi para dalawin si Ronald at walang mawawala kung magdodoble-ingat siya sa kanyang biyahe para hindi siya magkaroon ng bird flu. ‘Yun lang!

* * *

Hindi ko napuntahan ang send-off party  para kay Wyngard Tracy sa White Space noong Huwebes dahil hindi maagang natapos ang taping namin para sa Tweetbiz kaya may-I-go home ang drama ko.

Napaka-understanding ni Wyngard noong nabu­buhay siya at sure ako na maiintindihan niya ang hindi ko pagpunta sa kanyang party. Wala sa bokabularyo ni Wyngard ang salitang tampo. Ayaw na ayaw niya ng mga drama.

Never pa akong nakapunta sa White Space dahil dito rin ginanap ang birthday party ni Bong Revilla noong nakaraang taon pero hindi ko sinipot. Hindi ko makakalimutan ang birthday party ni Bong sa White Space dahil bisperas ‘yon ng pananalanta ng bagyong Ondoy sa Metro Manila.

* * *

Hindi news na magkasama sina Jennylyn Mercado at Dennis Trillo sa event ng mga organizer ng Metro Manila Film Festival sa Club Filipino noong Huwebes.

Maliban sa pagiging mag-dyowa, ang dalawa ang magkapareha sa Rosario kaya tama lang na sabay silang dumating at umalis.

Ang Rosario ang official entry ng Studio 5 sa MMFF. Ang Studio 5 ang movie outfit ng TV5 na pag-aari ni Papa Manny V. Pangilinan. Si Albert Martinez ang direktor ng pelikula na pinaka-expensive na official entry sa filmfest.

* * *

Naunang  bumalik ng Pilipinas si Dionisia Pacquiao. Bumalik kahapon ng bansa ang madir ni Manny at kasabay niya sa eroplano si Dra. Vicki Belo.

Kung magiging busy si Manny sa mga TV guesting sa pagbabalik niya ngayon, hindi magpapatalbog si Mommy Dionisia dahil meron din itong mga TV appearance.

Happy si Mommy Dionisia dahil nanalo ang kanyang anak sa huling laban nito pero bilang isang ina, naawa raw siya sa nangyari kay Antonio Margarito.

Kuha nga pala ni Cristalle Henares ang picture ni Mommy Dionisia habang nagdarasal ito sa Dallas Cowboys Stadium noong laban nina Manny at Margarito.