Rufa Mae ug Jomari ang kulukadidang

CEBU, Philippines - Si Rufa Mae Quinto ug Jomari Ylanna na matud pa karon ang dunay relasyon, suma pa sa showbiz anchor sa DZRH nga mibalita kagahapon sa buntag atol sa programang OkRyan sa dyRC 648kHz.

Ang tsika, kanunay matud pa nga makit-an ang duruha nga sweet na sweet samtang manuroy sa Makati City. Kung magtinan-away matud pa ang duruha, lupig pa ang bugas-pilit, ug hulmigas nalay kuwang tungod sa katam-is niini.

Dugang pa ni Tita Swarding nga wala masayod ang foreigner boyfriend ni Rufa Mae nga miduwa na og laing team ang iyang uyab dinhi sa nasud.

Matud pa nga ang maong langyaw maoy financer ni Rufa Mae ug labihan ka adunahan.

Wyngard di magpahaya, party ang gusto

Walay haya nga ipahigayon, kundili party ang mahitabo sa pagkamatay sa inilang talent manager nga si Wyngard Tracy kagahapon alas tres pasado sa kadlawon.

Si Tracy nga manager nila ni Richard Gomez, Lucy Torres, Wendell Ramos, John Estrada, ug Priscilla Meirelles—kinsa talent pud kaniadto ni Douglas Quijano nga mipanaw sa milabay nga tuig—nagtugon nga dili siya magpahaya, buot niya nga inay magbangutan ang iyang mga kadugo ug higala, kinahanglan nga magpahigayon sila og party.

Suma pa sa balita sa Philippine Entertainment Portal, si Tracy nalandig sa Makati Medical Center niadtong October 20, human matud pa nahiagom sa ikatulo niyang stroke. Pagka ugma, gi-operahan ang talent manager aron matud pa mawagtang ang blood clot sa iyang utok.

Niadtong July, mipailawom pud og heart surgery si Tracy human pud kini gidali pagdala sa tambalanan, gumikan sa heart attack.

Nasayran nga si Tracy unang nagsugod sa showbiz isip production assistant niadtong 1970’s. Nahimo siyang DJ sa labing unang pop radio station sa FM band, DWWK.

Wala magdugay, gikuha siya aron maoy mudumala sa mga talents ubos sa Vicor Records Corporation. Una gyud niyang talent mao si Basil Valdez. Ug misunod sila si Pinky de Leon, Leah Navarro, ug Maricris Bermont.

Paglabay sa duha ka tuig, nagtukod siya og kaugalingon management agency, ArtistStation, diin siya maoy nahimong manager nila ni Pilita Corrales, Maricel Soriano, Aiko Melendez, Jaya, Side A, Freestyle, Martin Nievera, Luis Manzano, Arnel Ignacio, Hans Montenegro, ug Willie Revillame.

Donya Dionesia?

Kini na matud pa maoy gustong ipatawag ni Dionesia Pacquiao sa iyang mga alipores niya. Ang tsika sa showbiz news chief sa DZRH Tita Swarding atol sa OkRyan sa dyRC 648kHz., sa 11 sa buntag kagahapon, mao na matud pa ni gustong ipatawag ni Dionesia sa mga bayot nga maoy kanunay mupagwapa niya didto sa General Santos City. Pwes, dili na Mommy D. ha!

Donya tihik?

Pero suma pa sa tsika ni Tita Swarding sa OkRyan sa dyRC 648 khz., kagahapon mao nga ang nasagap niya nga tsika, tihik ang inahan ni Pambansang Kamao. Suma pa nga dili gyud matud pa muhatag og tip si Dionesia. 

Drama ra?

Nagpakuyap-kuyap ra matud pa ang inahan ni Pacman atol sa away sa nahisgutan niadtong milabay nga Sabado sa gabii didto sa Texas. Ang tsika ni Tita Swarding sa OkRyan sa dyRC 648 kHz., kagahapon sa buntag mao nga nagyawyaw matud pa si Dionesia nganong walay mipaypay ug mipabarog niya dihang nahagba siya. Mi-eksena ra?

Best in shopping?

Samtang ang asawa ni Pacman nga si Jinkee gikatahong shopping galore ang drama didto sa Amerika sa wala pa ang away sa iyang bana batok kang Antonio Margarito. Tsika ni Tita Swarding atol sa showbiz-oriented program sa dyRC 648kHz., OkRyan kagahapon 11 sa buntag, tulo ka signature bags ang gipalit ni Jinkee, kantidad og P9million, matag usa. Ang tsika pa, ipanghatag ra matud pa ni Jinkee ang maong bag ngadto sa iyang mga higala.