Cebu Runway's Best 2010

CEBU, Philippines - Nagmalampuson ug mabulukon ang bag-ohay pa lang nga labing-una nga Cebu Runway’s Best 2010 niadtong Sabado sa gabii sa Teatro Casino, Waterfront Hotel-Lahug.

Ang maong indigay gipasiugdaghan sa Moonwalk Cebu Creative Productions ug miabot ngadto sa 18 ka mga ambongang lalake ug maanyag nga mga dalaga nga nagagikan sa nagkadaiyang unibersidad sa Sugbo ang nagtigi niadtong higayona aron paglangkat sa titulo nga ikapasigarbo ngadto sa mga tawo.

 Human sa duha ka oras kapin nga panagtigi pinaagi sa hugyaw nga fashion show, migawas nga mananaog isip Mr. Cebu Runway’s Best 2010 mao ang 18 anyos nga si David Horst Sommerauer.

 Kasamtangang nagtungha si David sa University of San Carlos – Main sa kursong Business Administration ug target niya nga mosalmot na pud puhon og mga dagkong pageant.

“ Wala gyud ko magdahom nga ako’y makadaug, kay ang tanan man gud nga nangapil, puros man gud mga lig-on ,” tsika pa ni David.

 Samtang ang Masscommunication student sa University of San Jose-Recoletos nga si Mary Carmel Allora Llopes maoy nakalangkat sa titulo nga Miss Cebu Runway’s Best 2010.

 “Salamat kaayo sa akong family ug sa akong mga friends kay wala gyu’y hunong ang ilang pagsuporta sa pag-apil nako sa kini nga pageant. Gibuhat lang gyud nako ang tanan aron lang matarong nako ang pagpaso, first time paman gud nako nga niapil ko og contest,” suma pa ni Mary Carmel.

Sila si Angelo Patrick Tiongco ug Natasha Angela Manuel maoy mga mananaug sa Cebu Runway’s Best Banat Hugyaw Choice award.

Si Angelo nakakuha og 3,561 votes samtang si Natasha nakaangkon og 2,091 votes. Tsika pa ni Angelo nga mapasalamaton siya sa mga readers sa Banat News sa kanunay nga pagsuporta kaniya ingon man usab ang iyang pamilya.

Nagkanayon usab si Natasha nga dako kaayo nga garbo kaniya ang paglangkat niya sa nahisgutan nga award gumikan kay nagpasabot kini nga nauyonan gyud siya sa katawhan.

 Pipila sa mga designers nga mihatag og partisipasyon sa maong show mao sila Leonardo Igloria ,Bernardo Flores, Carl Miñoza, Edwin Alba ug Bong Allosa.

 Ang inila nga designer sa Sugbo nga si Lemuel Rosos maoy pageant director samtang parte sa kita sa maong show adto mapunta sa Children’s Joy Foundation.