Morissette mupauli karon!

CEBU, Philippines - Malipayon nga gipahibalo ni Amay Amon nga kasamtangangan nasulod sa top 7 sa reality search sa TV5, Star Factor, ang iyang anak nga si Morissette.

 Matud pa ni Amay nga gumikan sa maong show iyang nakaplagan nga daghan pa diay og talento ang iyang anak.

“Nagtuo gyud ko nga kutob ra sa pagkanta ang nahibaw-an sa akong anak. Samtang nagdagan ang programa, nadiskubrehan nako nga kabalo pud diay si Morissette sa pagsayaw, hosting ug acting,” nagkanayon si Amay sa Banat News Hugyaw niadtong Sabado sa hapon.

Gikatakdang muabot dinhi sa Sugbo karong adlawa, November 15, si Morissette alang sa iyang homecoming. Taakon niya pagbalik ang mga dapit nga espesyal sa iyang kinabuhi. Kuyogan si Morisette sa crew sa Star Factor nga maoy mu-dokumento sa iyang kalihukan dinhi.

Gikatakda usab nga suruyon ni Morissette ang pipila ka mga dagkong tindahan diin siya tigkantahan kaniadto.

Dugang pa ni Amay nga dako siya og pagsalig sa talento sa iyang anak ug dako ang iyang pagtuo nga hingpit gyud kini nga makasulod sa kalibutan sa showbiz sa higayon nga matapos na ang maong show.

“Manghinaut lang ko nga magpadayon ang suporta sa mga Sugbuanon ngadto sa akong anak,” matud pa ni Amay.

Aminado si Amay nga daghang lig-on nga mga finalists sa maong show apan mulutaw gihapon ang karisma ni Morissette gumikan sa hugyaw nga tingog niini sa higayon nga modalit kini og song number.

Lumad nga taga Mambaling dakbayan sa Sugbo si Morissette ug tinun-an sa Asian College of Technology-Bulacao.