Maggie Wilson gibastos sa China

CEBU, Philippines - Daghan ang nakugang atol sa presscon sa teleseryeng Beauty Queen niadtong Martes human mayagyag nga dili diay maayo ang relasyon ni 2007 Bb. Pilipinas World Maggie Wilson ug ni Bb. Pilipinas Inc. chairperson Stella Marquez Araneta.

Si Maggie usa sa mga casts sa Beauty Queen, ang teleserye sa GMA-7 nga bituonan ni Iza Calzado ug magsugod na sa GMA-7 primetime karong Lunes, October 18.

Nakugang ang mga sakop sa entertainment press tungod kay nag-“Stella” ra gyud si Maggie sa nahisgutang BPCI chairperson ug nagpaduding pa tungod kay nag- no comment kini sa pangutana kung nakuha na ba niya ang iyang premyo isip Bb. Pilipinas winner.

Pero ang labing makakugang mao ang misunod nga rebelasyon ni Maggie diin iyang gibutyag nga gibastos diay siya og usa sa mga major sponsors, atol sa pre-pageant activities sa Miss World niadtong 2007 didto sa China.

Matud pa niya nga atol sa usa ka event, gihinol matud pa sa usa ka Chinese ang iyang sampot, hinungdan nga sa iyang kalagot gisagpa niya ang lalaki, kinsa wala makatingog dihang iyang gi-Englisan.

Suma pa niya nga mura matud pa sila og mga bar girls tungod kay pag-abot sa mga kandidata sa venue, alas dyes na pasado sa gabii ug hubog na ang mga sponsors. Gipa-table matud pa ang mga kandidata, duha matag lamesa kauban ang mga sponsors.

Ang iyang gikapungtan kay dihang nanawag siya ni Araneta dinhi sa Pilipinas ug misumbong sa iyang kasinatian, wala ray gihimo ang nahisgutan aron pagtabang niya.

Hasta matud pa ang Miss World Organization walay gihimo sa iyang nasinati sa kamot sa usa sa mga sponsors.

"Nang tumawag ako kay Stella, sinabihan niya ako na tapusin ko, wala siyang ginawa. Gusko ko nang umalis, ayoko na, sinabihan lang niya ako na 'Just finish it, you have to finish it.'

Hinuon giklaro ni Maggie nga daw nataymingan lang ang ilang batch niadtong 2007, tungod kay sa iya matud pa nga paghinabi sa ubang kandidata sa Pilipinas sa Miss World, wala sila makasinati og binastos gikan sa mga sponsors.

Samtang gipahibawo ni Maggie nga ang kangil-ad matud pa nga kasinatian sa mga kandidata sa beauty pageants luyo sa camera o sa stage maoy sentro sa teleserye nga Beauty Queen. Ipakita matud pa ngadto sa publiko nga dili sayon ang mahimong beauty-queen tungod kay mas daghang pag-antos ang maagian.

Main kontrabida niining maoy serye si Katrina Halili.

Faithfully ni Jovit Platinum na, major concert pud

Hingpit na gyud nga ilusad to full stardom si Pilipinas Got Talent first grand winner Jovit Baldivino pinaagi sa iyang labing unang major concert nga giulohan og Faithfully karong November 13 sa Aliw Theater.

Si Jovit kinsa mihugyaw sa publiko gumikan sa iyang makapanimbawot sa balhibo nga version sa mga kanta nga "Faithfully," nga iyaha sa American rock band Journey, ug "Too Much Love Will Kill You," sa British band Queen, suportahan og mga sikat pud nga mga sakop sa Star Magic.

Maglakip kini nila ni Yeng Constantino, Melai Cantiveros, Jason Francisco, ug Sam Milby. Mismong si Johnny Manahan, director of ABS-CBN's Sunday variety show ASAP maoy muhupot sa maong concert, diin ang acoustic singer nga si Nyoy Volante ang musical director.

 Sa presscon sa maong concert, si Jovit nga gipangutana unsay mapaabot sa mga mutan-aw unya gikan niya, igo lang miingon nga, "Basta po, tingnan na lang po nila."

 Suma pa sa PEP, pipila sa mga kanta ni Jovit sa umaabot nga concert ang malakip sa iyang second album.

Nasayran nga ang iyang debut album nga giulohan og Faithfully nag-Platinum na, buot pasabot mihalin na kini og 20,000 albums.

Kabayo naka 15M

Nagsaulog karon ang Viva Films tungod kay gikatahong mihipos og 15M ang Petrang Kabayo ni Vice Ganda sa pagbukas niini sa mga sinehan lukop nasud niadtong Miyerkules. Matud ni Vinia Vivar, gibutyag matud pa sa manager ni Vice, Ogie Diaz nga daghang mga sinehan ang mihangyo nga magdugang pa og sinehan nga kapasalidahan sa Petrang Kabayo gumikan sa positibo nga reaksyon sa publiko.

Kris naayo na!

Okay na si Kris Aquino ug duha niya ka mga anak, kinsa nabiktima og foot and mouth disease niining milabay nga mga adlaw. Gani karong adlawa ang first taping day ni Kris para sa horror film nga “Dalaw” nga entry sa Star Cinema para sa umaabot nga Metro Manila Film Festival. Matud ni Vinia Vivar, kolumnista sa Pang-Masa, wala pa matino kinsa nalay mahinayon sa original cast nga maglangkob nila ni Diether Ocampo, Mariel Rodriguez ug Coco Martin. Pagkakaron si Coco pa lang ang kumpirmadong dili makaapil.

Coco gikapoy, mubakasyon

Mubakasyon una si Coco Martin karon nga mahuman ang Idol teleserye niya sa ABS-CBN kauban si Sarah Geronimo. Kini kay sunodsunod na matud pa ang serye ni Coco ug wala na gyud siya makapahuway pa. Mangandam na pud siya alang sa Noy, nga nominado sa Best Foreign Language category sa Academy Awards sa Amerika. Kinahanglan niya nga magbalikbalik sa Amerika aron i-promote ang maong pelikula sa ingon masulod kini isip semi-finalist.

Gasto kaayo ang iDOL

Tungod matud pa sa kamahal sa produksyon ug kalisod pagtakdo sa schedule sa casts sa iDOL ang tinuod nga rason nganong humanon na ang maong teleserye ni Sarah Geronimo, suma pa ni Biboy Arboleda, Advertising and Promotions Head sa nahisgutang serye, ngadto ni Vinia Vivar, kolumnista sa Pang-Masa.

“As much as we want to prolong the show but due to constraints in production, schedules & difficulty in daily tapings, Idol will not able to fulfill its 10-13 week term on air. Mahirap magpaalam lalo pa at naging malapit na sa mga puso natin ang Idol. Patuloy na lang po nating suportahan ang Idol hanggang sa huli nitong linggo.”