Lahat ng lihim ng madyikero nadiskubre sa Magic Gimik!

MANILA, Philippines - Malalantad na ang ilang dekadang sikreto ng mga madyikero. Hango sa phenomenal na US reality series na Breaking the Magician’s Code: Magic’s Biggest Secrets Finally Revealed, lahat ng modus sa industriya ng mahika malalaman na simula ngayong Miyerkules (Oktubre 13), 8:00 pm sa Primetimes5 ng TV5.

Bawat episode, makalaglag-panga at matapang na ibubunyag sa publiko ang mga natatagong sikretong nababalot sa industriya ng salamangka sa Magic Gimik! Mabubuko na ang lahat ng bagay na lagpas sa nakikita ng mata ng publiko.

Paano pinaaangat ang isang bagay o tao? Paano nakakatakas ang madyikero mula sa mga buwis-buhay na stunt? Paano ginagawa ang mga tricks gamit ang baraha? Masasagot na ang mga tanong mo.

Lahat ng mga kabilib-bilib na mga ilusyon sisiyasatin na kasama ang makulit na tambalan nina Kean Cipriano at Empoy Marquez. “Ito ang show na hindi gugustuhin ng madyikero na mapanood mo,” ayon kay Kean, ang host ng bagong reality show na handa na rin matuto ng mga tricks kasama ang klasmeyt na si Empoy.

“Walang personalan dito. Panahon na para malaman ng publiko ang sikreto. Panahon na rin para mag-isip ng bagong tricks ang mga madyikero,” dagdag pa ni Kean.

Ang ayaw ipaalam ng mga madyikero, mabibisto na ng publiko sa Magic Gimik!