Ruffa Nataranta sa 'Dugo' Sa Bedsheet, Ipinasuri Pa

Sounds familiar ang kuwento ng pagpa-panic ni Ruffa Gutierrez dahil sa “duguan” na bedsheet sa kuwarto ng kanyang mga anak na sina Lorin at Venice. Nataranta si Ruffa at ang kanyang mga maid of honor dahil may dugo ang bedsheet pero walang sugat ang mga anak niya. Lalong walang monthly visitor ang kanilang mga kasambahay.

Nang ipasuri ni Ruffa ang bedsheet sa ospital, chocolate at hindi pala dugo ang mantsa ng bedsheet. Para sa iba, nag-over react si Ruffa pero naintindihan ko siya dahil may similar experience noon ang aking kapatid na si Evelyn na nataranta rin dahil may “dugo” rin sa bedsheet ng kanyang anak na si Joyce.

Siyempre, nag-isip kami dahil seven years old pa lamang noon ang aking pamangkin. Napakaaga pa para magkaroon siya ng menstruation. Dentista ang kapatid ko kaya hindi siya takot sa dugo. Siya mismo ang kumalkal sa bedsheet at natawa na lang kami dahil chocolate na nahigaan, natuyo at nagmantsa ang napagkamalan namin na dugo.

* * *

Sounds familiar din ang kuwento ng Shock Value, ang pinipilahan at pinupuri na stageplay ni Floy Quintos. Pare-pareho ang sinasabi ng mga nakausap ko na nakapanood sa Shock Value. Entertaining at showbiz na showbiz ang kuwento ng stageplay na base sa mga tunay na pangyayari sa mga artista at entertainment industry.

Sa sobrang ganda ng kuwento ng mga nakakausap ko, iniisip ko na panoorin na ito bilang suporta na rin kay Floy na love na love ko at matagal nang direktor ng No. 1 showbiz talk show ng bansa. Obvious ba na ang Startalk ang showbiz talk show na tinutukoy ko?

* * *

Ang tatay pala ni Solenn Heussaff ang kamukhang-kamukha niya. Parang pinagbiyak na bunga ang mukha ng mag-ama nang umapir si Mr. Heussaff sa Survivor Philippines noong Biyernes. Walang namana si Solenn sa hitsura ng kanyang Filipina mother.

Maganda ang kumbinasyon ng mga magulang ni Solenn kaya mga artistahin ang face ng kanilang mga anak.

* * *

Nag-walkout si Annabelle Rama sa taping ng Star Factor noong nakaraang linggo dahil na-upset siya nang matsugi sa contest ang star hopeful na malaki ang improvement ng talent sa pag-arte at pagsasayaw. Tuwing Linggo ang taping ng Star Factor at inaabangan kahapon kung sisipot si Bisaya sa taping.

Tapos na ang pag-e-emote ni Bisaya tungkol sa natsuging contestant ng Star Factor pero hindi siya sure kung makakapunta sa taping ng talent search show ng TV5 dahil nasa Singapore sila ni Eddie Gutierrez para sa kanilang honeymoon.

’Yan ang dilemma ni Bisaya noong isang araw, babalik ba siya ng Pilipinas para sa Star Factor taping o mananatili siya sa Singapore para makapag-enjoy sila ng husto ni Eddie sa kanilang grand vacation?

* * *

Mapapakinabangan ni Steven Silva ang knowledge niya sa Korean language dahil Koreano ang role niya sa Koreana, ang drama show na pagbibidahan ni Kris Bernal.

Ibinigay kay Steven ang Korean role dahil bagay ito sa kanyang physical appearance. Si Steven ang Ultimate Male Survivor ng StarStruck V at ngayon lamang siya magkakaroon ng regular show na mapapanood mula Lunes hanggang Biyernes.