The Bubbly Soul

CEBU, Philippines - Malipayon ug maabtik, si Jhelsea Maine Flores maisip nga komedyante sa upat ka mga Cebuano IDOL. Siya pud maoy labing gamay nilang upat, diin ang mao niyang lawas sigurado nga makapalumo sa labing kontrabida nga nilalang. Pero ayaw siya og ismola tungod kay maingon nga pagamay-gamay ra ning bataa, pero dako og ikabuga kung pagkanta na maoy hisgutan.

Bisan tuod og 17 anyos lang siya, makamao na siya nga mopadayag sa gikinahanglan nga emosyon sa iyang awit, talento nga igong magtukmod sa maminaw pagpangutana, unsa nga matang sa kasakit ug pag-antos ang iyang nahiaguman, hinungdan nga puno sa kinabuhi ang iyang pagkanta.

Dili na pud bag-o si Jhelsea sa natad sa bangga sa awit. Midaog siya sa Magandang Tanghali Bayan  (MTB) Duet Bulilit kauban ang lain pud nga Cebuano singer. Nakalangkat pud siya og luna sa Sinulog Idol niadtong Enero.

Sa Idol, usa siya sa mga underdog, lakip siya sa mga daug-daugon, hinungdan sila ni pop princess Sarah Geronimo maoy mag-inunungay. (BANATSHOWBIZ)