The Singing Ambassadress

CEBU, Philippines - Kinsay magtuo nga ang 15 anyos nga si Chadleen Alberth Lacdo-o, mamahimo diay nga mag-aawit, sanglit gihimugso man siya nga may “cleft palate”? Salamat na lamang kay adunay Operation Smile—usa ka kahugpungan dinhi sa Sugbo kansang kawsa mao ang pagtabang sa mga bata nga susama og depekto kang Chadleen. Busa sa edad nga kwatro, na-operahan si Chadleen, ug nakahimo na pagbuhi og matam-is nga pahiyom, dungan sa inanay na nga paggitib sa iyang talento sa pagkanta. Pagkakaron giila na siya nga “singing ambassadress”, sa Operation Smile.

Sa iyang linghod nga pangidaron, nakauban na niya ang mga sikat nga mga mag-aawit sama nila ni David Pomeranz, Pops Fernandez, Martin Nievera ug ang kadungan niya sa Little Big Star kaniadto nga si Charice Pempengco. Ug gumikan sa iyang koneksyon karon sa Operation Smile, nakataak na pud siya sa China, Vietnam ug United States, aron paambitan ang iyang makadani nga musika.

Pero sa IDOL, hayan makadani pud siya og kalagot gikan sa mga tumatan-aw, sanglit lakip siya sa grupo sa mga babaye nga maoy mga kontrabida. Hinuon, angay nga sayran sa kadaghanan nga ang mao niyang papel, sukwahi kaayo sa buotan ug matinahuron nga taras ni Chadleen sa tinuod nga kinabuhi. (BANATSHOWBIZ)