James ayaw mag-comment sa 'pagkikita' nina Mayor Binay at Kris

TRUE : Dumating na si James Yap kahapon ng umaga galing Los Angeles, California.

Tipid na tipid ang mga sagot nito sa kung ano ang plano niya pagkatapos ng ilang linggong bakasyon sa Amerika.

“No comment” lang ang sagot niya nang hiningan namin ng reaksiyon tungkol kina Kris Aquino at Makati Mayor Junjun Binay.

Wala siyang alam sa mga balita rito na nagkita sa isang mall sina Kris at Mayor Binay at tinanong ni Baby James si Kris kung boyfriend na ba niya si Mayor Binay.

Ang tanging nasabi lang ni James ay magmi-miting pa raw sila ng abogado niya ngayong araw at magsisimula na rin daw siyang mag-practice.

TANONG : Totoo kaya ang nakita ng isang staff ng isang talk show sa GMA 7 na naghu-holding hands sina Richard Gutierrez at Solenn Heusaff?

Kapag may mga tao na raw, bumibitaw na si Richard at minsan ay hinahawakan daw niya sa may likod si Solenn.

Madalas silang nagkakasabay sa promo ng Survivor Philippines : Celebrity Showdown at naiintriga rin silang dalawa, pero pareho nilang itinatangging may namumuong romansa sa kanilang dalawa.

TOTOO KAYANG binabantayan na raw ngayon itong beauty queen/actress kapag pumapasok ito sa isang kilalang make-up store dahil madalas ay nawawalan daw sila ng lipstick?

Ilang beses na raw nilang naobserbahan na tuwing pumapasok itong si beauty queen/actress, tumitingin daw ito ng iba’t ibang klase ng lipstick. Matagal daw itong magta-try ng lipstick pero wala namang nabibili. Pero pagkatapos nilang ligpitin ang mga lipstick na sinubukan nito, napansin nilang nawawalan sila ng isa.

Hindi lang daw minsan ‘yan nangyari kundi ilang beses na raw na nawawalan sila ng lipstick kapag tumitingin itong si beauty queen/actress.

Nahihiya raw silang sitahin ito dahil respetado pa naman ito at minsang nagbigay rin ng karangalan sa ating bansa.

Kaya ngayon ay may order na raw sa make-up store na ito na bantayan ito nang mabuti at hulihin na kung sakaling mawalan na naman sila ng isang lipstick.

Wala naman daw ibang pinagtitripan ang beauty queen/actress kundi lipstick lang!

TSIKA LANG : Pumirma ng kontrata si Dingdong Dantes bilang endorser ng Asia Yaosho Japan.

Ito ang nangungunang Filipino convenient store sa Japan at wala silang napiling endorser kundi si Dingdong lang.

Pagkatapos ng contract-signing nung nakaraang linggo ay tumuloy ito sa pictorial para may mga billboard na ito sa lahat na mga tindahan ng Asia Yaosho sa Japan.

Inaayos nila ngayon ang pagpunta roon ni Dingdong para ma-promote ang naturang store.

Tinanong ang aktor kung sakaling papuntahin ba siya ng Japan, isasama ba nito si Marian Rivera para magbakasyon na rin sila roon?

Depende raw sa schedule ng aktres, dahil hindi naman kasali si Marian bilang endorser.

Kung sakali, pipiliin ba niya ang Japan bilang lugar ng honeymoon kung ikakasal sila?

“Hindi siguro. Mas gusto namin ang medyo romantic para sa aming dalawa,” sagot nito.

Hindi pa naman daw pinag-uusapan ang kasal, pero kung si Dingdong ang tatanungin sana si Marian na raw ang babaeng makakasama niya habang-buhay.

Samantala, bukas naman pipirma si Marian ng renewal of contract sa GMA 7.