Naawat lang nina Regine at John, Dingdong Dantes at Bayani muntik nang mag-upakan

MANILA, Philippines – TRUE: Nagkaroon ng tensiyon sa birthday party ni Ogie Alcasid nung nakaraang Biyernes na ginanap sa Ayala Heights Clubhouse.

Hindi namin nakuha ang buong detalye pero tina­lakan daw ni Annabelle Rama si Angeli Pangilinan.

Pagkatapos nun, sina Dingdong Dantes at Bayani Agbayani naman daw ang muntik nang magkagulo.

Hindi raw ito napansin ng ilang guests dahil naawat naman sila nina John Estrada at Regine Velasquez.

Nakiusap ang isa sa kanila na huwag na itong palakihin dahil hindi naman daw maganda na nasa isang bakuran lang sila ay nag-aaway-away pa.

TANONG: Totoo bang aabot sa hiwalayan ang mag-asawang Dingdong Avanzado at Jessa Zaragoza dahil sa hinaharap nilang problema?

Inamin ni Jessa nang humarap ito sa ilang movie press kamakailan lang pero inaayos naman daw nila ngayon at nagka-counseling raw sila sa tulong ng ibang malalapit na kaibigan.

Nagpapasalamat din si Jessa sa close friends nila na patuloy na naga-guide sa kanila at nagbibigay ng payo para huwag silang bumigay at umabot sa hiwalayan.

 “Hindi madali ang pag-aasawa! Love is not enough,” makahulugang pahayag ni Jessa.

TOTOO KAYANG isang malaking serye ang pinaghahandaan ngayon ng GMA 7 na pagbibidahan ni Marian Rivera?

Hindi raw si Dingdong Dantes ang ka-partner niya rito at medyo daring ang role kaya hindi pa nila tiyak kung tatanggapin ba ito ng aktres.

May ideya na kami kung tungkol saan pati ang title ng malaking proyektong ito ng GMA 7 pero hindi pa puwedeng i-reveal dahil medyo matagal pa bago ito simulan at matinding pre-production pa ang gagawin.

TSIKA LANG: Mamayang gabi na magsisimula ang Survivor Philippines Celebrity Showdown na ihu-host ni Richard Gutierrez.

Isang oras daw muna ang pilot episode nito para ma-establish ang pagdala sa kanila sa isang isla ng Thailand.

Interesting daw ang bawat episode kaya inaasahang susubaybayan ito nang husto.

Tiyak na hindi naman ito mapapanood pero malalaman din kung sino sa mga castaways ang nahubaran dito.

Ang isang hunk daw ang nahuling hindi pala suot ang underwear ay si Ervic Vijandre kaya nahubaran ito sa isang challenge nila.

Ang isa pa raw sa nakakaloka ay si Pretty Trizsa na aksidenteng nasunog daw ang underwear nito nang pinatuyo niya ito sa apoy. Kaya sa ibang challenge nito ay wala rin siyang underwear kaya may mga pagkakataong walang pakialam daw itong nakabuyangyang ang pruwebang isa siyang lalaki.

Malalaman din kaya rito kung sino ang isa sa castaways ang hindi na niya mismo nakayanan ang sariling amoy kaya pinag-iisipan na nitong sumuko, para makaligo na siya na may shampoo at sabon?