'Walang sinumang makakatinag sa amin ni Dingdong' - Marian

TRUE: Itinatanggi ni Marian Rivera na may pinagseselosan itong isa sa mga kasama nila sa cast ng Endless Love.

Ang baguhang si Bella Padilla ang tinutukoy sa naglalabasang in­triga pero say ni Marian, wala siyang makitang basehan para magselos.

“May kategorya ako bago ako magselos at wala pang umabot sa level ng kategoryang ’yun. Saka walang selos! Lahat na nga ginagawa sa akin ni Dong (Dantes), magseselos pa ako ’di ba? Sobra-sobra na ’yung ginagawa sa akin ni Dong, at walang dahilan para magselos.

“Alam naman ng lahat kung gaano kami katibay, kung gaano namin kamahal ang isa’t isa. Dahil lang sa isang iglap, dahil lang sa ganun, mawawala kami? Hindi! Walang sinumang makakatinag sa aming dalawa,” mariing pahayag ni Marian.

TANONG: Bakit si Manay Lolit Solis lang ang wala sa launch ng bagong commercial ng Cebuana Lhuiller na ginanap sa ASAP nung nakaraang Linggo?

Ang daming naaliw sa bagong commercial ni Sarah Geronimo kasama ang tatlong kontrabida na pinangunahan ni Manay Lolit, Celia Rodriguez, at Gladys Reyes.

Bongga pa naman ang launch nito sa ASAP kaya nakakapagtaka kung bakit si Manay Lolit lang ang hindi umapir sa naturang variety show.

Siyempre, tinanong namin ang columnist-TV host tungkol diyan. Isang nagmamaang-maangang “ewan ko” ang sagot sa amin.

Hindi naman siguro siya pinigilan ng GMA 7? Welcome naman siguro siya sa ASAP?

TOTOO KAYA ang nakarating sa amin na tsikang nagkasalubong sina JC Tiuseco at Dominic Roco sa lobby ng condo na tinitirhan ni Maxene Magalona?

Ang tsikang nakarating sa amin, kasama ni JC doon sa lobby ang co-host niya sa X-Life na si Gino dela Peña at parang meron silang imi-meet na kaibigan.

Babatiin sana ni Dominic si JC pero parang umiwas ang huli kaya nagdedmahan na lang sila.

Nakarating ito kay Maxene at natawa na lang siya.

TSIKA LANG: Very positive ang naramdaman ng lahat na maiuuwi ni Venus Raj ang korona ng Miss Universe beauty pageant dahil sa malakas na malakas ito sa mga Internet polls, hindi lang dito sa ating bansa kundi hanggang sa United Kingdom.

Laging pumapangalawa si Venus sa mga nagbi-bet sa online voting kaya lalong lumalakas ang loob nito na lalo niyang galingan ang pakikipagtunggali niya sa mga nagagandahang kandidata sa buong bansa.

Nakausap ng Tweetbiz si Nicolette Henson na nasa Las Vegas din, at lahat sila ay sobrang excited para kay Venus.

Humihingi pa sila ng dagdag pang dasal para makamit ni Venus ang titulo.