Maria Venus Raj Dalaga Sa Humayan

CEBU, Philippines - Kinsay magtuo nga ang usa ka binuhat nga nagtubo sa humayan sa Bato, Camarines sa Bicol, mutuyhakaw og maayo aron suwayon pagtarok ang bandila sa Pilipinas sa Miss Universe 2010 ugmang adlawa didto sa Las, Vegas.

Si Maria Venus Raj, nga nahimugso didto sa Doha, Qatar, apan human nagbuwag ang iyang amahan nga Indian, ug inahan nga Pinay, gipauli siya dinhi sa Pilipinas ug binugtong nga gimatuto sa iyang mama. Mag-uuma ug mananahi ang iyang inahan.

Payag nga giatupan og nipa, gisawgan og kawayan ug gibungbungan og anahaw, ang ilang gipuy-an. Wala kini sugang dagitabnon, ug nahimutang tunga-tunga sa kahumayan. Sa nasayran, dinhi sa gagmay dalan sa basakan nabaid ni Venus ang iyang abilidad sa pagrampa, nga iyang napahimuslan og maayo human sa pipila ka tuig nga miabot.

Kamanghuran sa lima ka managsuon, si Venus nagsugod og apil sa nagkadaiyang indigay sa kaayag sa ilang dapit niadtong nag-ead siya og 17. Misalmot pud siya og nagkalain-laing oratorical contests sa San Vicente High School, diin ang iyang maestra sa English maoy iyang coach sa maong mga contests. Suma pa nga ang premyo ni Venus sa tanang indigay nga iyang gisalmutan, maoy iyang gigamit pagpalit og yuta alang sa iyang inahan pinaagi sa data-data.

Mitapos siya og bachelor’s degree in Communication Arts, major in Journalism, sa Bicol University sa Albay, isip Cum Laude, pinaagi sa scholarship nga iyang nadawat gikan sa Francis Papica Foundation. Mi-alagad siya isip Information Assistant sa Department of Environment and Natural Resources sa Bicol.

Alang sa kadaghanan, inspirasyon ang pagpakigbisog ni Venus nga makuha pagbalik ang iyang korona human kini gitangtang pipila ka buwan ang milabay gumikan sa wala magkadimao niya nga birth certificate. Ang iyang kadaugan sa maong pakigbisog mimugna og kasaysayan sa natad sa indigay sa kaanyag sa lawas, sanglit siya maoy labing unang kandidata nga napalagpot sa Bb. Pilipinas, apan nakuha pagbalik ang korona.

Ugma puhon, human sa malampuson niyang pakigbisog magmadaugon kaha siya didto sa Miss Universe 2010 didto sa Las Vegas aron dad-on ang ikatulo nga korona sa Pilipinas gikan sa maong indigay? Duna siyay gitas-on nga 5’9, gibug-aton nga 110lbs, ug vital statistics nga 35-22-35. Paigo na kaha kining tanan aron ang dalaga sa humayan, sa tibuok kalibutan na morampa ug dili na sa basakan?..Dugang detalye gikan sa www.wikipedia.com