Lovi close na close kay Chavit

Ang saya-saya kahapon ng presscon ng 103.5 Wow- FM dahil sa mga dialogue nina Mr. Fu, Laila Chikadora, Tina Rayan at ng ibang mga DJ na kasama nila.

Siyempre, bumangka sa open forum si Mr. Fu dahil siya ang maraming isyu na dapat sagutin.

Ang sey ni Mr. Fu, si Mo Twister at hindi siya ang highest-paid DJ sa FM station.

Nilinaw rin niya na hindi true na may hidwaan sila ni Tim Yap pero malamang na magkatotoo na ang kanilang gap dahil sa kanyang mga tactless comment.

Ibinuko ni Mr. Fu na naging blind date noon ni Tim si Tina. Hindi nagkaroon ng positive result ang blind date dahil ibang mhin ang nagustuhan ni Tina.

Hindi ko na uulitin ang mga dialogue nina Mr. Fu at Tina dahil love ko si Tim! Kahit ano pa ang sabihin nila, Team Tim ako dahil mabait siya sa akin.

Team Yap sana ang gagamitin at isusulat ko pero baka isipin ni James na siya ang tinutukoy ko ‘no!

*    *    *

Nagmamadaling umalis kahapon si Gorgy Rula sa presscon ng mga bagong recruit na DJ ng Wow-FM dahil pumunta sila ng crew ng Startalk sa Makati Regional Trial Court para i-cover ang hearing ng Nullity of Marriage nina James at Kris Aquino.

Dinumog ng mga TV reporter at TV crew ang hearing pero nabigo sila na malaman ang mga nangyayari sa loob ng korte dahil closed door ito.

Bago pa siya pumunta sa Makati RTC, ikinuwento sa akin ni Gorgy na sasamahan si Kris ng kanyang mga kapatid. True enough, kasama nga ni Kris sa hearing sina Ballsy, Viel at Pinky.

Dahil hindi pinayagan sa loob ng korte ang media, clueless sila sa ibang mga napag-usapan nina Kris at James sa chamber. Basta ang alam nila, pinayagan si James na dalawin si Baby James kaya pagkatapos ng hearing, go na siya sa condo unit ni Kris para bisitahin ang kanyang anak.

*    *    *

Narinig ko sa presscon ng Wow FM ang kuwento na hindi nakapag-report si Kris sa Pilipinas Win Na Win noong Huwebes.

Mismong si Kris yata ang source ng balita na iyak siya nang iyak noong Huwebes dahil sa mga nangyayari sa paghihiwalay nila ni James kaya hindi siya nakaapir sa Pilipinas Win na Win.

*    *    *

Absent si Joey de Leon sa Startalk noong Sabado pero aapir na siya ngayon sa aming show.

Sari-saring tsismis ang kumalat sa disappearing act ni Papa Joey.

Watch ninyo ang Startalk ngayong hapon dahil baka sakaling magbigay si Papa Joey ng explanation. I cannot speak for him ‘no!

*    *    *

Kahapon ang arrival ni Ilocos Governor Chavit Singson mula sa Hong Kong pero depende ‘yon sa kanyang desisyon dahil baka biglang nagbago ang isip niya.

Lumipad si Papa Chavit sa Hong Kong dahil sinaksihan niya ang hearing sa drug trafficking case ng kanyang anak, si Congressman Ronald Singson na certified dyowa ni Lovi Poe.

Kampante na si Papa Chavit as in nakakahinga na siya nang maluwag dahil wala na sa kalaboso ang kanyang anak.

Kung napanood ninyo ang video na kuha sa Hong Kong, tiyak na napansin ninyo ang closeness nina Papa Chavit at Lovi. Ang ibig sabihin, tanggap na tanggap ni Papa Chavit si Lovi bilang girlfriend ng kanyang anak.