Diva todo hilak sa Love Bug

CEBU, Philippines - Gipahibalo ni   Diva Montelaba nga angayan gyud atngan sa mga Sugboanon ang umaabot niya nga mga eksena sa Love Bug sa GMA-7 gumikan kay masaksihan gyud ang todo niya nga paghilak atubangan sa kamera.

“Manghinaut ko padayon nga suportahan sa mga taga Cebu ang Love Bug ilabi na nga mao kini ang first project nako sa GMA-7,”   tsika pa ni Diva sa dihang eksklusibo nga nahinabi sa Banat Hugyaw kagahapon.

Suma pa ni Diva nga kapila na siya nga nakasab-an sa direktor sa Love Bug nga si Andoy Ranay apan iya kining giisip nga instrumento aron mabaid pa og maayo ang iyang acting skills ilabi na nga bag-o pa siya sa showbiz industry.

Usa ka dance number ang gidalit ni Diva sa mga Sugbuanon sa Party Pilipinas mall show kagahapon sa SM City-Cebu diin iyang nakauban sila si Miguel Escueta,Gian Magdangal, Julianne San Jose ug Enzo Pineda.

Gipahibalo usab ni Diva nga human sa Love Bug, aduna puy gihulma nga bag-ong programa ang GMA-7 alang kaniya apan dili pa niya kini puwede ibutyag. (BANAT SHOWBIZ)