Fretzie mo-eskuyla gyud

CEBU, Philippines - Mainiton nga gidawat sa mga Sugbuanon ang pagbalik ni Fretzie sa iyang yutang natawhan niadtong Lunes.

Gikan sa airport, midiretso na si Fretzie og courtesy call sa buhatan ni Mandaue City Mayor Jonas Cortes ug gisundan dayon kini og usa ka hugyaw nga motorcade, pasado alas nuwebe sa buntag.

Human niini, nakigtagbo siya sa iyang mga kaparyentihan ug mipahuway nianang pagka hapon isip pagpangandam sa iyang paghimamat sa iyang mga tigpaluyo pagka gabii.

Pagka alas siete sa gabii, midumog dayon ang iyang fans sa Banilad Gym alang sa usa ka Homecoming Party alang kaniya nga gipasiugdahan sa Fretziecians (Fretzie’s Fans Club).

Usa ka sayaw ang gihalad ni Fretzie ngadto sa iyang fans diin   nasaksihan gyud mismo sa kadaghanan ang kahanas niya sa maong natad.

Aminado si Fretzie nga mag-atubang gyud siya og intriga puhon busa iya na nga giandam ang iyang kaugalingon.

“Mangandam na lang ta ana, mao man gyud na ang showbiz , maabot gyud ang bisan unsa nga intriga,” niya pa.

“Nagpasalamat ko ninyo og maayo kaninyong tanan (fans) sa inyong pag-support nako sugod sa pag-apil nako sa PBB. I hope nga padayon ko ninyo nga suportahan ,” matud pa ni Fretzie sa exclusive interview sa Banat Hugyaw niadtong Lunes sa gabii.

Dugang pa ni Fretzie nga plano niya karon nga mag-home study aron dali ra siya makatikang sa Manila sa higayon nga makadawat siya og TV project.

‘Importane man gud na ang pag-eskwela, seguro i-balanse na lang gyud ang akong time kung makadawat ko og project,” tsika pa ni Fretzie.

Malipayon si Fretzie gumikan kay nasuwayan na niya ang pag-guest sa musical variety show nga ASAP XV, sanglit viewer lang siya kaniadto ug wala niya damha siya napud maoy tan-awon sa kadaghanan sa entablado mismo sa maong Sunday show.

Romana Santa kang Cesar

Ang Romana Santa starring Aljur Abrenica ug Rhian Ramos maoy unang project ni Cesar Montano sa iyang pagbalik sa nataran sa GMA-7. Kahinumduman nga apil unta siya sa Lupin kaniadto starring Richard Gutierrez, pero mibiya siya tungod kay nagpapili isip senador niadtong 2007.

Gary-Martin Movie

Tungod sa malampuson nga panagpares nila ni Gary Valenciano ug Martin Nievera pinaagi sa AS 1 repeat concert karong Biyernes, ug sa game show nga Twist and Shout, duna na matud pay plano aron magkauban pud sila sa usa ka pelikula.

Image model na

Si Barbie Forteza maoy labing bag-ong image model sa Bunny BNY Petite. Resulta matud pa kini sa iyang popularidad karon isip “Tween Sensation.”

Si Maricel nagpatangtang?

Migawas ang taho karon nga si Diamond Star Maricel Soriano maoy nagpatangtang kang direk Andoy Ranay sa “Pilyang Kerubin” starring Barbie Forteza ug Joshua Dionesio. Mao matud pa kini kondisyon ni Maricel, una pa niya gidawat ang tanyag niya sa maong pantaserye nga karon ubos sa direksyon ni Maryo J. delos Reyes.

Kris ug James dili kasado?

Daghan ang nakugang sa pamahayag sa abogado ni Kris Aquino sa TV Patrol niadtong Lunes sa gabii.

Kini kay gipamulong ni Atty. Anna Liza Logan nga dili legal separation o annulment ang haom nga proseso kundili Declaration of Nullity of Marriage kay matud pa sa sinugdanan pa lang walay bili ang natigayon nga kasal nila ni Kris ug James niadtong 2005 sa balay ni Boy Abunda.

Nagdumili na ang abogado pagluwat og dugang detalye kabahin sa legal nga proseso kabahin sa panagbuwag nila ni Kris ug James.

Bea naglisud isip Gelai

Ang iyang role isip Gelai sa teleserye nga ‘Magkaribal” sa ABS-CBN maoy labing lisud alang kang Bea Alonzo tungod kay dili man siya sabaan sa tinuod nga kinabuhi. Salamat na lang matud pa kay gitabangan siya sa mga taga-Divisoria. - Ryan Mark

Steven nagkinahanglan og giya

Nakabalik na gikan sa Camiguin ang mga kanhi “StarStruck V” finalists nga sila si Steven Silva, Sarah Lahbati, Enzo Pineda ug Diva Montelaba. Sa nahisgutang dapit   gihimo ang TV project nila nga    “Lovebug Presents…Exchange of Hearts” sa GMA-7.Tsika pa ni Diva nga ila gyud nga gitudloan si Steven sa mga pinulongang Tagalog hinungdan nga natarong niini ang paglenggua sa mga pulong nga nakabutang sa script.Samtang gipadayag sa program manager sa Love Bug nga si Hazel Abonita nga pasado ang acting nila ni Sarah ,Diva, Enzo ug Steven.

Wyngard nadala sa tambalanan

Nalandig sa tambalanan ang talent manager nga si Wyngard Tracy gumikan kay gi-obserbahan ang iyang kasingkasing, kung kinahanglan pa siya nga ipalawom og angioplasty.

cesar ugma pa mopirma

Wala madayon gahapon ang pag-pirma unta og kontrata ni Cesar Montano sa GMA-7 busa giuswag na lang kini ugmang adlawa.

Ricky nag-adjust pa

Nagsugod na sa iyang trabaho niadtong Lunes si Ricky Carandang bag-ong Communications head ni President Noynoy Aquino ug nag-adjust pa kini karon.