Nagtulibagbag ang Langit Sa Piling Mo!

CEBU, Philippines - Palpak: Bugal-bugal sa mga Bisaya ang ‘Langit Sa Piling Mo” pilot episode sa GMA-7 kagahapon. Samtang nindot palandungon nga gihatagan nila og dungog ang Sugbo pinaagi sa paghimo niining pinuy-anan sa character ni Heart Evangelista, perteng bakikawa paminawon nila ni Rey PJ Abellana, Sheryl Cruz ug uban pa, nga mag-binisaya. Pilipila sa mga linya ni Rey PJ: “Dili ba kayo nalipay.” “Tagaan niya ko award sa anibersaryo ng kompanya.” Gawas nga murag telegrama ang pagkahan-ay, dili pa gyud mao ang delivery!

Nanundog sa Agua Bendita

Palpak: Tataw nga nanundog ang “Langit Sa Piling Mo“sa estilo sa “Agua Bendita” aron pagkuha sa pagbati ug suporta sa mga Sugbuanon. Ang dakong kalainan mao nga sila si Pilar Pilapil ug Vina Morales mga bisaya gyud, samtang si John Estrada nga taga Mindanao makamao pud mo-binisaya. Gani ang mga dili mga bisaya, gipakat-on gyud og bisaya sama ni Dimples Romana, ug uban pa. Dugang niini, ang Agua Bendita migamit og local talents sa ilang mga eksena nga dinhi sa Sugbo, hinungdan nga dili bakikaw paminawon ug tan-awon.

Interview ni KC kuwang sa unod

Palpak: Dismayado ang pipila ka mga suki sa The Buzz sa interview ni KC Concepcion kang K Brosas sa The Buzz niadtong milabay nga Domingo. Kini human wala gyud matud pa matuki ni KC kinsay amahan sa anak ni K ug, wala pud niini mapangutana kung may mga showbiz suitors ba kini, nga matud pa makahatag og interes sa publiko.

Pagtarong Cogie!

Palpak: Dili maayo ang pagbalik ni Cogie Dominggo sa showbiz karon, nga gawas nga gi-intriga nga naghugaw-hugaw sa usa ka lawak sa hotel sa Makati, nangangkon pa gyud nga nagkauyab sila ni Angel Locsin kaniadto nga hugtanong gihimakak sa actress. Suma pa sa mga showbiz observers angay nga dili magpataka og buka sa iyang baba si Cogie aron walay maglagot niya ug matunhay ang iyang showbiz comeback.

Ka Noli mi-apply sa ABS-CBN?

Mikomedya si outgoing vice-president Noli de Castro nga mi-apply na matud pa siya og trabaho sa ABS-CBN. Hinuon hagbay ra gibalita nga usa nila ni Julius Babao, Henry Omaga Diaz, ug Ted Failon ang nameligro nga mawagtangan og trabaho sa pagbalik ni Ka Noli.

Malampuson gihapon

Malampuson ang Fusion CD launch sa VoizBoiz niadtong Sabado sa gabii sa Zirkoh Tomas Morato bisan paman sa farewell concert sa Apo Hiking Society.

Ayaw kog pasanginli please

Hugtanong gihimakak ni Cogie Domingo nga gihugawhugawan niya ang bongbong sa usa sa mga lawak sa Royal Belagio Hotel sa Makati City.

French boyfriend ang uso

Si Adrien Semblat, usa ka French national ang gikatahong bag-ong uyab karon ni Isabelle Diaz, samtang laing French national nga si Ben Wintle ang bag-ong boyfriend sa kanhi uyab ni John Lloyd Cruz nga si Liz Uy.

Patambal sa St. Luke’s La Aunor

Mahimo ra kaayong matambalan ang pagkahanaw sa tingog ni Superstar Nora Aunor sa St. Luke’s Medical Center!

Alternate, dili co-director

Magpuli-puli isip director sa Party Pilipinas sila si Rico Gutierrez ug Mark Reyes. Dili magdungan.

Mugna away’ng Vice and Tado?

Gidudahan nga scripted o planado ang away nila ni Tado ug Vice Ganda sa Showtime niadtong milabay nga semana gumikan kay susama sila og manager, si Ogie Diaz.

Charice Live sa “Regis”

Human sa sayop nga balita nga dunay special appearance si Charice sa sikat nga TV musical sa America karon, ang Glee, pormal na nga gipahibawo sa inahan sa Pyramid singer nga sa “Live with Regis and Kelly” mogawas si Charice karong June 16, aron pag-promote sa iyang self-titled international album niini. Ang ‘Live with Regis and Kelly” usa ka morning talk show sa America nga gidumala nila ni Regis Philbin ug Kelly Ripa.

Kim ug Sid pareson!

Dunay umaabot nga Maalaala Mo Kaya episode si Kim Chiu minus Gerald Anderson. Ang balita nga nadawat sa Banat Hugyaw mao nga si Sid Lucero maoy mapares ni Kim niining maong episode, ug kung mo-click sila, hingpit na nga bungkagon ang Kimerald.

Jacq bida na gyud!

Pwes, bida na gyud si Jacq Yu. Siya ang suod nga higala ni Aubrey Miles nga model ug misalmot sa search for the Next White Girl sa ABS-CBN kaniadto. Karon, siya maoy bida sa indie movie nga ang producer mao ang kanhi sexy star nga si Lara Morena. Giulohan og “Fling” pares ni Jacq si Rafael Rossel nga paborito na karon sa mga indie movies.