Kris hindi kayang banggitin ni Rich

Heto ang publicity photo ni Heart Evangelista sa Langit sa Piling Mo, bilang si Marj na isang flight attendant. Sa teaser pa lang ng soap na pinagtatambalan nila for the first time ni Mark Herras, marami na ang pumupuri’t bagay daw sa aktres ang flight attendant role at gandang-ganda ang viewers sa kanya. 

Hindi lang love story ang Langit sa Piling Mo, family drama rin ito na ang setting ay airport kaya masisilip ng viewers ang mundo ng paliparan at pagbibiyahe. Mapa­panood sa soap na magpa-pilot sa May 31, bago ang 24 Oras ang mga sikat na lo­cation sa bansa para bigyan nang natatanging kulay ang soap sa direksiyon ni Gil Tejada at script ni Senedy Que.

Para mas makatotohanan ang takbo ng ku­wento, nagpatulong ang GMA 7 sa Civil Aviation Authority of the Philippines, Manila International Airport at isang professional cabin crew instructor para mag-guide sa mga artistang gumaganap na cabin crew kabilang si Heart.

* * *

Nag-go see si Diva Montelaba last Monday para sa Bench Uncut : The Denim & Underwear Show at kung napili, rarampa siyang kasama sina Sarah Lahbati, Steven Silva at Rocco Nacino na pare-parehong Bench endorsers.

Ang Party Pilipinas palang ang regular show ni Diva sa GMA 7, pero sa third episode ng Lovebug, sila na nina Sarah, Enzo at Steven ang mga bida at excited ito dahil sa Guam ang taping nila. First time niyang lalabas ng bansa at first time nilang apat to work together, kaya masaya at excited siya.

* * *

Magkasama pala sina Kris Bernal at Rich Asuncion sa next episode ng Lovebug after last Romance nina Dennis Trillo at Carla Abellana. Kontrabida ni Kris ang role ni Rich at gugulo sa relasyon nina Kris at leading man nitong si Daniel Matsunaga.

Sa Singapore kinunan ang Love Bug na first time pagsasamahan nina Kris at Rich na nababalitang hindi nagbabatian dahil kay Aljur Ab­renica na love team ni Kris sa The Last Prince at ex (na raw) ni Rich. Sana isinama rin si Bianca King sa cast na sinasabing GF ngayon ni Aljur para mas masaya.

Walang press na nakasama sa taping, walang makakapagbalita kung nagbabatian off-camera sina Kris at Rich. Sa tweet ni Rich, never niyang nabanggit si Kris at puro places na pinuntahan niya sa Singapore ang tsinika.