Offer na pelikula kay Nora nakapila na sana

Kahit anong gawing pangmamata ng maraming ipokrito sa ating lipunan sa mga artistang puma­pa­laot sa larangan ng pulitika ay hindi pa rin talaga mata­tawaran ang mga kilalang personalidad na kina­katigan ng suwerte kapag sumu­subok ang mga ito sa magulo at maruming mundo ng pulitika tulad na lamang nitong nakaraang halalan. 

Nangu­na sina Sen. Bong Revilla at Sen. Jingoy Estrada sa labing­walong naha­lal na senador at pumasok din sa magic 12 sina Sen. Tito Sotto at Sen. Lito Lapid. 

Ang Star for All Seasons at gobernador ng Batangas na si Vilma Santos ay muling nakuha ang tiwala at suporta ng mga Batangueño. Pinalad ding maging bokal ng Batangas ang Drama King na si Christopher de Leon. 

Si Herbert Bautista naman ang bagong halal na mayor ng Quezon City kung saan ding nanalo bilang konsehales sina Ro­derick Paulate, Alfred Vargas, at Gian Sotto.

Si Isko Moreno pa rin ang nahalal na vice-ma­yor ng Maynila at konsehal pa rin sa nasabing lugar si Yul Servo. Nanalo ring konsehal ng Makati si Monsour del Rosario at sa Parañaque ang naka­babatang kapatid ni Anjo Yllana na si Ryan Yllana.

Si E.R. Ejercito ang pinakabagong gobernador ng Laguna at kongresista naman sa nasabing lugar si Dan Fernandez.

Pinalad din si Daniel Fernando sa isang lugar sa Bulacan. 

Nakalusot din sa Caloocan sa pagka-konsehal si Marjorie Barretto at si Teri Onor bilang board member ng Bataan.

Nanalo ring kongresista ng lone district ng Bacoor, Cavite ang misis ni Sen. Bong Revilla na si Lani Mer­ca­do at ang misis ni Richard Gomez na si Lucy Torres-Gomez sa ika-apat na distrito ng Leyte.

Sa anumang uri ng labanan, kung may nananalo, me­ron din siyempreng natata­lo at kasama na rito sina dating Pangulong Joseph ‘Erap’ Estrada, Cesar Mon­tano na kumandidato sa pagka-gobernador ng Bohol, Imelda Papin na tumakbo sa pagka-senador, Edu Manzano sa pagka-pangalawang pangulo, Ara Mina, Arnell Ignacio at Ogie Diaz sa pagka-konsehal ng Quezon City, Rico J. Puno at Jobelle Salvador sa pagka-vice-mayor ng Makati at iba pang hindi gaa­nong nag-ingay nang kumandidato.

Hindi man nakabalik sa Malacañang si dating Pa­ngulong Erap, masuwerte naman ang kanyang dala­wang anak na sina Sen. Jinggoy Estrada na muling balik-senado at ang outgoing mayor ng San Juan na si JV Ejercito dahil ito nga­yon ang nahalal na bagong kon­gresista ng San Juan habang ang ina nitong si Ms. Guia Gomez ang bagong halal na mayor ng nasabing siyudad.

I’m sure, Salve A., kulang pa ang aking listahan ng mga nanalo at natalong showbiz personalities nitong nakalipas na halalan.

* * *

Alam mo, Salve A., marami ang nagtatanong sa akin kung bakit hindi natuloy ang pag-uwi ng superstar na si Nora Aunor sa Pilipinas noong isang buwan. While ‘yun ang orihinal na schedule ng kanyang pag-uwi at pagbabalik-showbiz, may mga dahilan kung bakit nabalam ang kanyang pag-uwi. Pero very strong ang aming paniniwala na makakauwi pa rin siya sa taong ito pero mauurong nga lamang ng ilang buwan.

Kung trabaho ang pag-uusapan, hindi mawawalan ng offer si Guy dahil ang OctoArts Films ang kauna-unahang nagpahayag ng interes na kunin ang ser­bisyo ni Guy at may nilulutong magandang proyek­to ang kumpanyang pag-aari ni G. Orly Ilacad na pa­ma­mahalaan ng premyadong team nina Joel Lamangan at Ricky Lee.

Nagpaabot din ng interes ang GMA Films, ganoon din sa isa pang film project na pamamahalaan ni Jef­frey Jeturian. Pero gaano man kagaganda ng mga pro­yektong naghihintay kay Guy, mananatili itong walang saysay hangga’t wala siya sa Pilipinas.

Sabi nga ni Kuya Germs, hintayin na lamang natin ang pagbabalik ni Guy pero ayaw din niyang mag­bigay ng siguradong petsa.

* * *

May kilig factor pa rin talaga ang tambalan nina Robin Padilla at Vina Morales at ito’y napatunayan nang mag-guest ang ate ni Shaina Magdayao sa Wo­wowee kung saan si Robin ang pansamantalang (o permanente na?) naghu-host nito. At hindi rin ikinaila ni Vina na kinikilig pa rin siya sa kanyang ex boyfriend.

Salve A., malakas ang aming paniniwala na posibleng ma-rekindle ang love affair nina Robin at Vina lalupa’t pareho na silang malaya ngayon. Hiwa­lay na si Robin sa kanyang misis na si Liezl Sicangco ganundin si Vina sa ama ng kanyang anak.

May plano ring pagsamahing muli ang dalawa sa pelikula na may pamagat na Ang Tatay Kong Hood­lum na sequel ng box office hit movie nilang Ang Utol Kong Hoodlum kung saan nagsimula ang relas­yon noon nina Robin at Vina. Wanna bet?

* * *

[email protected]