Lucy 'di halatang napagod sa kampanya
May mga pinuntahan ako kahapon kaya hindi ko natapos ang panonood sa P.O.5. Hindi ko tuloy alam kung may nanalo na sa brand new car na pinahuhulaan. Ang makakahula sa eksaktong halaga ng kotse at ng mga laman nito sa loob ang mapapalad na mananalo.
Ang kaso, mahirap hulaan ang exact price kaya nagbigay na raw ng order si Papa Manny Pangilinan na ibigay ang kotse sa sinumang makakahula sa pinakamalapit na halaga. Sosyal debah?
* * *
Pinanood ko rin ang Party Pilipinas na live kahapon mula sa Camarines Sur. Pawisan ang mga artista at host ng Party Pilipinas dahil sa mainit na panahon pero dedma sila dahil mas mahalaga na mabigyan ng kasiyahan sa panonood ang mga televiewers at ang mga kababayan natin sa Camsur.
In fairness, malaki na ang improvement ng Party Pilipinas dahil very young at hip ito. Equal na rin ang exposure ng mga baguhan at mga datihang performers.
Hindi ako sure kung mainstay na si Wyn Wyn Marquez ng Party Pilipinas. The who si Wyn Wyn? Siya ang panganay na anak na babae nina Alma Moreno at Joey Marquez. Ipinakita kahapon ni Wyn Wyn ang kanyang husay sa pagsasayaw. Namana ng bagets sa kanyang ina ang galing sa pagsasayaw.
Wyn Wyn ang palayaw niya dahil ipinanganak siya nang mag-win si Joey sa unang sabak nito noon sa pulitika sa Parañaque City.
* * *
Umapir na kahapon si Lucy Torres sa P.O.5. Hindi halata sa mukha ni Lucy na napagod ito sa pangangampanya dahil nakapahinga na siya.
One Sunday lang na hindi napanood si Lucy sa P.O.5 dahil naging busy na siya sa pangangampanya sa Ormoc.
Nang bumalik kahapon si Lucy sa kanyang Sunday show, congresswoman na siya. Nagbago ang kapalaran ni Lucy, apat na araw lang pagkatapos niyang ihain ang kanyang certificate of candidacy bilang substitute ni Richard Gomez.
* * *
Wala akong masabi sa pag-substitute ni Robin Padilla kay Willie Revillame bilang host ng Wowowee.
Basta ang alam ko, marami ang naloka nang maglaro sa Pinoy Henyo ng Eat Bulaga sina John Lapus at Mr. Fu.
Hindi kasi nasagot ni Mr. Fu ang showbiz personality na pinahuhulaan sa Pinoy Henyo. Sa dami ng sagot na oo ni John, hindi nahulaan ni Mr. Fu ang name ni German Moreno.
* * *
Lumipad na kahapon si Richard Gutierrez sa Amerika para sa shooting ng pelikula nila nina Claudine Barretto at Anne Curtis.
Sa May 23 pa yata ang umpisa ng shooting pero napaaga ang biyahe ni Richard para makapagpahinga siya.
Hindi naman maiinip si Richard sa condo nila sa Beverly Hills dahil nandoon ang kanyang tatay na si Eddie Gutierrez. Matagal nang nasa Amerika si Eddie dahil siya ang nag-supervise sa renovation ng kanilang sosyal na condo sa Beverly Hills.
- Latest
