"Gabii sa Pamalandong ug Pag-ampo"

CEBU, Philippines - Pangaliyupo, pag-ampo, paghinulsol, pagpasalamat. Dinhi niining maong mga tema mituyok ang mensahe sa 12 ka mga orihinal nga komposisyon nga nagtigi sa 4th Hunino (Huni Alang Kang Señor Santo Niño) Songwriting Contest sa Basilica del Sto. Niño Pilgrim Center niadtong milabay nga gabii.

Human sa dul-an tulo ka oras, makabibihag nga sonata ni Queen of Bossa Sitti, mga pakatawa sa host nga si Fr. Dan delos Angeles ug mga bulawanong mga pulong gikan sa iyang co-host nga si Maryrose Villacastin-Maghuyop, ug makuti nga pagtimbang-timbang sa mga hurado, pormal nga gipakanaog ang hukom.

Ang kanta nga “Panalipdi Kami Sto. Niño,” ni Diomedes Licmo-an ug lyrics nila ni Lourdes Milette Licmo-an ug Nellita Caballes maoy migawas nga mananaug. Ang maong kanta nagtuki sa pagpanamastamas sa tawo sa Kinaiyahan ug pagpangayo og pasaylo ngadto sa Labaw’ng Makagagahom, dungan sa pagpangaliyupo nga unta kahatagan pa og ikaduhang higayon aron kini maampingan ug mabantayan, gihatagan og kinabuhi nila ni Norelyn Endrina ug Jingle Placencia, kinsa mao usay midaog isip Best Interpreter.

“During sa Novena (sa Sto. Nino) gi-flash man gud ang kabahin sa restoring the environment, so mao to among gi-capture nga message,” nagkanayon si Diomedes sa Banat Hugyaw human sa ilang kadaugan.

Aminado usab sila nga ang nahiaguman sa Luzon atol sa Bagyong Ondoy, usa sa nakahatag og inpirasyon aron mahimugso ang maong awit kabahin sa pagpanalipod ug pag-amoma sa Kinaiyahan.

Ang magtiayong Licmo-an dili na bag-o sa Hunino, sanglit sa milabay nga tuig, ang ilang mugna nga “Holy Child Desire” nahimo nga finalist. Lumolupyo sa Pajac, Lapulapu City, ang magtiayong Licmo-an mga alagad usab sa ilang parokya. Si Lourdes katekista sulod na sa lima ka tuig, samtang si Domedes lay minister. Karong umaabot Mayo 1, magsaulog ang ilang parokya sa kapistahan ni St. Joseph, ug duna silay gimugna nga kanta pahinungod sa ilang patron, nga giulohan og “San Jose Haligi sa Pamilya.”

Nakakuha sa ikaduhang ganti mao ang “Pangamuyo” nila ni Joseph Abella ug Nino James Banares, ug giawit ni Daryl Shane Leong. Ang third placer mao ang “Hinungdan sa Pagtuo,” nga ginama ug giawit ni Jay-Arr Librando. Midawat og P50, 000 ang first prize winner, P30, 000 alang sa second, ug P20, 000 ang third. Samtang P10, 000 usab ang sa best interpreter.

Lakip sa mga finalists karong tuiga mao ang ‘Ikaw Panalipod Ko,”ni Fr. Ponce Jed Billones; ‘Sto Niño Dalan Sa Kaluwasan,” ni Richelou Gonzales; “Among Bawnon” ni Manolito Languido; “Daghang Salamat Sr. Sto. Niño” ni Russel Alegado; “Salamat Sto. Niño ni Rommel Ambi; “ Prayer To Sto. Niño” ni Jean Suarez Dabacol; “O Mahal O Batang Sto. Niño” ni Eugene Ebisa; “Sto. Niño Hari Ka” ni Obdulia Serrano; ug “Sto. Niño Karon Ug Sa Gihapon” ni Roger Sucayno.

Ang mga hurado karong tuiga naglakip nila ni Rev. Fr. Jomas Mejares, Rev. Fr. Rodolfo Bugna, Rev. Fr. Renchie Sinoro, Atty. Maribelle Adelfa “Ging-Ging” Navarro-Laude, Postulant Michael John Tambasin, music gem Lucien Lataba ug Engr. Emmanuel Abellana.

Ang Hunino nga gisugdan sa mga kapariang Agustino upat na ka tuig ang milabay gitumong sa pagbaton og mga awit para sa Balaanong Bata. Sa paglabay sa mga katuigan, milawig na kini ngadto sa pagpatungha sa mga utokan apan walay ikasarang nga mga anak sa mga sakop sa Basilica United Vendors and Photographers Association (BUVPA), pinaagi sa halin sa Hunino CD nga mapalit sa Sto. Niño Store.

Sa makadiyot nahinuklog ang gatusan ka mga tawo nga misaksi sa kalihukan niadtong Martes sa gabii, atol sa pagpakita sa testimonya sa mga nakapahimulos nga mga vendors kansang mga anak nahimong scholar sa Sto. Niño. Usa ka scholar, kinsa tinun-an sa kursong Psychology namahayag nga sa higayon nga makatapos siya sa iyang pagtuon, bisan og wala siya hangyoa, siya na pud ang mopatungha sa ubang mga bata aron dili mahunong ang nasugdan sa mga kapariang Agustino. Usa ka inahan usab ang mapasalamaton gumikan kay niya pa, makamao na mobasa ug nabuotan na ang iyang anak, ug panghinaot niya nga pinaagi sa scholarship dili na mahisama ang iyang mga anak niya nga wala makalampos sa pagtuon gumikan sa kapobre.

Samtang midugang sa kamabulokon sa 4th Hunino mao ang UC Dance Company ug Hunino String Orchestra ubos sa baton ni Professor Roberto del Rosario nga maoy miduyog sa tanang finalists. Si Nendel Endrina maoy musical arranger, samtang ang SOUNDTRAXX Studio sa magtiayong Gani ug Gloria Villarojo maoy over-all production in-charge.