Sam ug Sarah para sa "Glee" serye

CEBU, Philippines - Si Sam Milby ug Sarah Geronimo ang magpares sa usa ka teleserye sa ABS-CBN, nga matud pa Pinoy version sa Glee, sikat nga US musical-comedy-drama series. Pero posibleng sa tungang bahin pa niining tuiga kini masugdan sanglit human sa shooting ni Sarah para sa pelikula nga Hating-Kapatid, molarga pa sila ni Mark Bautista sa katapusang bahin sa Mayo alang sa series of concerts sa USA ug Canada.

IMYLC P140.1M na

Mihipos na og P140.1 million ang reunion movie nila ni John Lloyd Cruz ug Bea Alonzo, ang “I Miss You Like Crazy,” sa ikalima na ka semana niini sa mga sinehan. Ginama kini sa Star Cinema.

Buwag dayon!

Desidido na gyud si Wendy Valdez nga ipa-annul ang ilang kasal ni Bruce Quebral, ug positibo siya nga dili kini malangay tungod kay misaad ang nauwahi nga mo-cooperate siya sa proseso. Matud ni Wendy, nga mitekang pa siya og Dubai sa milabay nga tuig aron suwayan og sulbad ang ilang problema pero wala na gyud mahusay.

 “Pilyang Kerubin”

Ang remake sa romantic-comedy movie “Pilyang Kerubin” ang follow-up primetime project sa First Time stars nga sila si Joshua Dionisio, Barbie Forteza, ug Jake Vargas.

Buwag bisag dili uyab

Sayop matud pa ang intriga nga nagbuwag na sila ni Dondon Hontiveros ug Valerie Concepcion. Matud ni Val ngadto sa Pang-Masa, unsaon man nila pagbuwag nga wala man sila magkauyab? Hinuon miangkon siya nga dili kaayo sila magkuyog ni Dondon karon tungod kay labihan niya ka busy, ilabi na nga duna siya’y Precious Hearts Romances Presents Love Me Again pares si Tom Rodriguez, nga magsugod karong hapon.

Carla ug Dennis na

Duha ang umaabot nga projects ni Carla Abellana sa GMA-7. Gawas sa SineNovelang Basahang Ginto, nila ni Geoff Eigenman, magpares pud sila ni Dennis Trillo para sa romantic comedy show sa GMA 7, ang Love Bug, sa direksyon ni Mark Reyes. Una silang nagpares ni Dennis isip hosts sa Starstruck V.

Kantaserye gyud

Nahibalik na didto sa Manila sila si Regine Velasquez ug Ogie Alcasid gikan sa ilang Holy Week vacation didto sa Amanpulo in Palawan. Happy kaayo si Regine tungod kay padayong nagkataas ang rating sa iyang kantaserye sa GMA 7, ang Diva, nga matud pa niya lahi kaayo sa milabay niya nga projects sanglit murag kada adlaw gyud siya mokanta sa taping.

Paneguro mo’g workshop!

Balik na ang todo workshop sa Final 14 sa Starstruck V karong adlawa. Sa acting, under sila nila ni Gina Alajar, Direk Uro dela Cruz, ug veteran actress nga si Vangie Labalan. Sa hosting, under sila ni Direk Freddie Santos, sa voice lessons under silani Atek Jacinto, sa dance, kang Miggy Tanchangco, ug Sandy Hontiveros. Kada usa nila gradohan nila ni direk Joel Lamangan para sa acting, Douglas Nieras sa dancing, ug Atek sa singing.

“Melason in the City”

Sama sa gibalita na sa Banat Hugyaw sa milabay nga semana, karong 10:00 sa buntag magsugod ang “Melason in Da City,” nila ni Melissa Cantiveros ug Jason Francisco sa ABS-CBN. Ang maong proyekto magpakita sa ilang mga pagpanimpad sa syudad isip gikan sa probinsya ug dunay mga damgo nga buot matuman alang sa ilang tagsa-tagsa ka mga pamilya. Follow-up kini sa malampuson kaayo nga “realiserye” “Melason In Love,” nga gibutonan sa giisip karong nga “Prinsesa ug Prinsipe ng Masa.”

Sexy Maja

Si Maja Salvador maoy pambato sa Preview Magazine karong buwana, diin ang iyang cover maoy giisip nga labing sexy niya nga pictorial alang sa usa ka fashion magazine.

Hot Coco!

Si Coco Martin pud ang nag-una sa listahan sa Chalk Magazine alang sa ilang “10 Hot Boys of Summer 2010,” diin kasagaran sa mga nasulod mga commercial model. Sa cover story, gipadayag ni Coco nga wala siya mangita og gwapa gyud nga babaye, gusto niya nga broad-minded lang ang babaye, dili bright pero daghan lang og nahibaw-an sa pagkinabuhi niining kalibutana.

EnRich on the go!

Mubukas karong April 16 ngadto sa 22 ang labing unang pelikula nila ni Enchong Dee ug Erich Gonzales isip loveteam. Kini mao ang “Paano Ko Sasabihin” nga sa SM Cinemas ra isalida ug ubos sa Cinema One Originals, sa direksyon ni Richard Legaspi, nga gradwado sa Asian Film Academy sa Pusan, South Korea

Marian in action!

Gipakatap na sa Regal Films ang tulo ka promotional pictures para sa umaabot nga romantic comedy movie “You to Me are Everything” nga nagbalandra sa kaanyag ni Marian Rivera ug ni Snowy the Pig. Makauban ni Marian niining maong movie si Dingdong Dantes.