Sugat sa Guadalupe Plantsado na

CEBU, Philippines - Ang Archdiocesan Shrine of Our Lady of Guadalupe Parish nangandam na sa pagsaulog sa Semana Santa pinaagi sa buhing paghulagway sa mga kasinatian ni Hesus partikular na sa pagtubos niya sa mga sala sa katawhan nga misampot sa iyang kamatayon sa krus.

Ang mga kabatan-onan sa Parokya sa Guadalupe naghiusa sa paghandum sa Semana Santa nga nagsilbi nga tipik sa ilang partisipasyon sa mga kalihukan sa simbahan.

Sa Marso 28, (ugma) Palm Sunday ipahigayon ang usa ka parada gikan sa San Nicolas Parish paingon na sa Parokya sa Guadalupe diin ipahigayon ang usa ka passion play.

Duna pu’y partisipasyon niini ang pipila ka banggiitan nga magdudula sa entablado nga nagagikan sa Pardo ug Argao, ubos sa direksyon sa inila na nga personalidad sa GMA-7 Cebu ug dySS Super Radyo nga si Aljin Abaquita.

Sa laing bahin, alas dos pa lang sa kadlawon sa Abril 4, masaksihan ang Sugat sa Guadalupe 2010 diin ipahigayon na usab ang laing dula sa entablado.

Sa unang bahin niini, himuon ang drama nga nag-ulohan og “Tungod sa Gugma” nga maghisgot sa pagpatigbabaw sa maayong butang batok sa dautan. 

Sundan usab kini sa tradisyonal nga dula kabahin sa pagkabanhaw ni Hesus gikan sa mapait niya nga kamatayon sa krus ug ang ilang panagtagbo sa iyang inahan nga si Maria.   

Gawas sa dula sa entablado, masaksihan usab ang hugyaw nga dalit sa pipila ka mag-aawit   sa Sugbo sama nila ni Cerj Michael , Pia Abejo ug uban pa.

Ang nahisgutan nga mga kalihukan gidumala sa Parish Pastoral Council, Parish Youth Coordinating Council ubos usab sa pag-abag ni Msgr. Jose Montecillo ug sa uban nga mga kaparian sa maong parokya.

 “We aim to evangelize and enhance effectively the faith of the laity through dramatics and visual aids,” suma pa ni Msgr. Montecillo.