Cool Center manamilit

CEBU, Philippines - Giingong manamilit na sa dili madugay ang programang Cool Center nila ni Anjo Yllana ug Eugene Domingo. Kini gumikan kay panahon na nga atimanon ni Anjo ang iyang political career sanglit magpapili siya pagka bise-mayor sa Parañaque. Hinuon hulipan kini og Laugh Kita!, diin usa gihapon si Eugene sa host niini ug iyang makauban si Allan K.

“Lola” nanghawod sa Miami Filmfest

Ang independent film nga “Lola” nga giderek ni Brillante Mendoza maoy nakadaug sa bag-ohay pa lang nga Miami Film Festival didto sa Florida,USA. Sa laing bahin, ang maong pelikula misalmot usab isip pambato sa Pilipinas sa Deauville Asia Film Festival sa France.

Pauleen milayat paingon sa TV5

Matud pa sa tsika nga magpares sa usa ka serye sila si JC de Vera ug ang bag-ong talent sa TV 5 nga si Pauleen Luna. Si Pauleen ang labing bag-ong talent nga mipirma og non-exclusive contract sa TV 5. Bisan naa na sa TV 5 si Pauleen, padayon gihapon siya nga makita sa Eat Bulaga sa GMA-7 sanglit usa man kini ka block time program.

Arnel nangayo og pasaylo sa NHI

Nangayo og pasaylo si Arnel Pineda ngadto sa mga kadagkoan sa National Historical Institute (NHI) gumikan sa pagkasayop sa tono sa dihang gikanta niya ang Pambansang Awit sa away tali sa Pinoy boxing champ Manny Pacquiao ug Ghanaian challenger Joshua Clottey niadtong Domingo sa Texas. Matud pa ni Arnel nga iyang gibuhat ang kutob sa iyang makaya busa di siya kapugos sa mga tawo nga wa makontento sa iyang kinantahan. Rason pa niya ”artistic freedom” niya ang iyang gipahimuslan sa iyang pagkanta.

 “Saving Sally”

Malipayon kaayo si Rhian Ramos kay subli niya nga makauban si TJ Trinidad sa usa ka proyekto pinaagi sa indie film nga nag-ulohan og “Saving Sally”. Unang nagkauban sila si Rhian ug TJ sa mga programa niadto sa GMA-7 nga Stairway To Heaven ug Dear Friend.

Tuesday wala magpatintal sa TV 5

Mipirma na og exclusive contract si Tuesday Vargas sa GMA-7 busa natuldukan na ang tsismis nga matud pa mobalhin ang komedyante sa TV 5. Kontento na si Tuesday sa iyang pagka-kapuso, ilabi na nga duha ang kasamtangan niya nga mga programa , ang Show Me Da Manny ug Laf En Roll.

Hukom ni Kris gipaabot

Human sa emosyonal nga pagdepensa ni Kris Aquino sa iyang pamilya sa The Buzz niadtong Domingo, gikatakda nga ugmang adlawa i-anunsiyo ni Kris kung angayan ba siya nga mopahuway sa maong programa o dili. Busy ang TV host karon sa pagpangampanya sa iyang igsuon nga si Sen. Noynoy Aquino kinsa midagan pagka-presidente sa nasud.

Pambatong Korean Series sa TV 5

Sugod karong Marso 22, makita na ang lima ka Korean series nga idalit sa TV 5 gikan sa alas 11:45 sa buntag hangtud sa ala 1:45 sa hapon. Ang maong dynamic noontime block gitawag og Gusto Ko Noon nga naglangkob sa My Housewife is a Superwoman (11:45 ), First Wives Club (12:30),Smile, Honey (1:15)., ug High Kick (1:45). 

Sunshine piloto ang uyab

Blooming kanunay ang panagway ni Sunshine Dizon karong panahona gumikan kay gawas nga graduating siya sa gikuha niya nga kursong Culinary Arts, inspired usab siya sa usa ka ambongan nga lalake nga matud pa usa ka piloto.Di niya ibutyag ang identity sa maong lalake aron magmalinawon ang ilang relasyon.

Aljur magpa-sexy sa iyang konsyerto

Bisan busy sa taping sa The Last Prince, padayon gihapon ang pagbansay-bansay ni Aljur Abrenica alang sa umaabot niya nga solo birthday concert karong Biyernes, Marso 26 sa Zirkoh Morato nga nag-ulohan og I’m Yours. Daghan usab ang nag-atang sa gisaad ni Aljur nga magpa-sexy sa usa ka segment sa nahisgutang konsyerto. Special guests sa maong kalihukan sila si Kris Bernal, Allan K., ug Jolina Magdangal. 

Second  Album ni Princes gilusad na

Gilusad na sa Viva Records ang ikaduhang album sa acoustic singer nga si Princess Velasco nga nag-ulohan og “Addicted to Acoustic 2” . Misikat na usab karon ang usa sa unod sa maong album, ang   kaugalingon niya nga version sa Bad Romance ni Lady Gaga. Apil si Princess sa Party Pilipinas sa GMA-7.