Superstar nasobrahan ng shopping sa Japan

Alam mo, Salve A., marami ang nagtanong sa akin kung ako na raw ba ang bagong ma­nager ng magbabalik-showbiz na superstar na si Nora Au­nor dahil ako ang nakita nilang kasa-kasama nito sa Tokyo, Japan nang siya’y sumailalim ng beau­ty en­hance­ment sa Shinagawa Beauty Center. 

Para ma-clear ang issue, hindi ako ang mana­­ger ni Guy (Nora) kundi ang Master Showman na si German Moreno na matalik na kaibigan ng superstar. 

Ako lamang marahil ang nagbigay-daan para sa kanyang muling pagbabalik nang siya’y aking ire­ko­menda at ipaglaban na kuning celeb­rity en­dorser ng bubuksang Japa­nese eye laser at aes­theric center sa Pilipinas, ang Shina­gawa Lasik and Aesthetic Center (Philippines) na inaa­sahang magbubukas sa susunod na bu­wan. 

Ito’y joint venture ng dalawang malala­king kum­pan­ya sa Japan, ang IPS at Shina­gawa Clinic Group of Companies.

Liban sa aking Japanese boss at ilang tao (in­cluding good friend Albert Sunga), walang naka­alam kung ano ang aking pakay sa daglian kong paglipad patu­nong Los Angeles, Ca­li­fornia kama­kailan. 

May­roon akong ‘sec­ret mission’.  

Sa tulong ni Albert Sunga, na­kuha ko ang land­line number at cell phone number ni Guy sa L.A.  

Inalam namin ang kan­yang status sa Ame­rika. Meron kasing mga nag­la­basang balita na kes­yo hindi na siya ma­ka­kabalik ng Ame­rika ka­pag siya’y umalis patungong ibang bansa. 

Siya mismo ang nagsabi sa amin na wala siyang prob­lema at agad nitong ipinakita sa amin ang kanyang green­card. At that time, expired na ang kan­yang passport. Pero agad niya ring inayos.

First travel ni Guy outside the U.S. ang pagtu­ngo ng Japan kaya ganoon na lamang ang kanyang excitement. Mag-isa rin siyang bumiyahe.

Isang touching moment ang aming na­sak­sihan nang magkita ang mag-inang Guy at Ian na kasama kong bumiyahe na hindi nagkita sa loob ng ilang taon nang dumating ang superstar sa Japan.  

Kakaiba rin ang aura ni Guy. Kitang-kita ang excitement sa kanyang mukha lalupa’t unang biyahe niya ito in five years sa labas ng Amerika.

Originally, si Lotlot (de Leon) ang gustong makasama ni Guy sa Japan pero hindi ito makaalis dahil sa kanyang bagong TV series sa GMA 7 kaya napagkasunduan namin na si Ian na ang papun­tahin.

Sa kabila ng sobrang lamig, enjoy si Guy sa klima at wala itong pakialam sa kasa-shopping lalo na nang kami’y lumipat ng hotel mula sa Prince Hotel, Shinagawa hanggang sa Villa Fontaine, Ueno na walking distance lamang ang shopping center.

Malayang nakapag-shopping si Guy sa Japan al­though paminsan-minsan ay may mga kababayan na­tin siyang nakakasalubong at hindi makapani­walang kaharap nila ang superstar na ba­litang-balita rin sa Japan ang pagdating doon sa pa­ma­magitan ng TFC ng ABS-CBN at GMA Pinoy TV ng GMA 7.

Bago bumalik ng LA si Guy nung Feb. 28, naka­pag-pictorial ito last Feb. 27 for publicity at short TV interview na siyang napanood sa iba’t ibang prog­rama ng ABS-CBN at GMA 7.

By this time ay nasa Canada na si Guy para sa kanyang four-city concert tour sa buong buwan ng Marso. Sa buwan naman ng Abril ay naka­takda siyang bumalik ng Pilipinas para tuparin ang kanyang pagiging celebrity endorser ng Shinagawa Lasik and Aesthetic Center (Philippines) sa pama­magitan ng pictorial, TVC shoot, ribbon-cutting sa pagbubukas ng clinic, press conference, at iba pang mga commitments na naghihintay sa kanyang muling pagiging aktibo sa showbiz.

o0o

[email protected]