Kahit may hold order, Hayden Kho nakasibat pa-Amerika
Ikinuwento sa akin ni Iza Calzado na nakita niya si Nanette Medved sa event ng Century Tuna noong Linggo.
Hindi napigilan ni Iza na lapitan at ipakilala ang sarili niya kay Nanette dahil na-starstruck siya.
Hindi nanonood ng TV at wala nang connection sa showbiz si Nanette kaya hindi niya kilala si Iza.
Naka-focus ang atensiyon ni Nanette sa pag-aalaga sa kanyang dalawang anak at sa mga negosyo nila ng asawang si Cris Po, ang big boss ng Century Tuna.
Paulit-ulit ang pagsasabi ko na isa si Nanette sa mga alaga ko na masuwerte. Hindi siya nagkamali sa kanyang desisyon na mag-goodbye sa showbiz at ipagpatuloy ang pag-aaral niya.
Komportableng-komportable na ang pamumuhay ngayon ni Nanette. Kinaiinggitan siya ng ibang tao dahil napakaganda ng kanyang buhay.
* * *
Kausap ko kahapon sa cellphone si Aljur Abrenica at nag-dialogue ito na hindi totoo na may tampo siya sa akin.
Hindi ko na kinulit si Aljur kung true ang balita na hiwalay na sila ni Rich Asuncion dahil baka hindi niya tuparin ang pangako na bibigyan ako ng mga Bench gift certificates.
Malapit na uli ang Holy Week. Ang madala ang kanyang buong pamilya sa Holy Week ang dream ni Aljur dahil gusto niyang ipasyal sa Disneyland ang mga kapatid.
Nami-miss din ni Aljur ang pagbabakasyon sa Puerto Galera, ’itsurang traumatic ang kanyang huling pagpunta doon noong Holy Week.
* * *
Natuwa ako para kay Phillip Salvador nang malaman ko na si Malou Fagar na ang kanyang manager.
Matagal-tagal na kasi na naghahanap si Ipe ng manager na tutulong sa kanyang showbiz career.
Matunog na “boss” ang tawag ni Ipe kay Mama Malou na manager din nina Maricel Soriano, Roderick Paulate, Joey Marquez, at marami pang iba.
Maganda ang simula ng 2010 ni Ipe dahil naabsuwelto siya sa estafa case ni Cristina Decena. Sa tulong ni Mama Malou, hindi malayo na magtuluy-tuloy na ang lucky streak ni Ipe.
* * *
Magkikita kami mamaya ni Dr. Victoria Belo na kararating lang mula sa Amerika. Nag-iisip pa ako kung tatanungin ko si Mama Vicki kung totoo ang balita na kasama niya sa kanyang US trip si Dr. Hayden Kho, Jr.
May mga tsismis na kumakalat na together sila sa Amerika na ayaw paniwalaan ng iba dahil may hold departure order (HDO) kaya si Hayden kaya mahihirapan ito na lumabas ng Pilipinas.
Iba naman ang sabi ng lawyer na kakilala ko. Puwedeng makapunta sa ibang bansa ang mga tao na may HDO basta may clearance ng korte at siyempre, may bail bond.
Hindi nagsisinungaling si Mama Vicki. Sure ako na sasabihin niya sa akin ang the truth and nothing but.
* * *
Bisi-bisihan sina Steven Silva at Sarah Lahbati. Kaliwa’t kanan ang kanilang mga TV guestings mula nang mag-win sila bilang mga Ultimate Survivors ng Starstruck V.
Sa totoo lang, hindi pa sila nakakapagpahinga ng husto mula nang lumabas sila sa condo unit sa Eastwood na tinirhan ng mga finalists ng Starstruck.
Mas busy pa nga ngayon sina Sarah at Steven kesa noong mga contestants pa lang sila sa artista reality search show ng Kapuso network. In fairness to them, hindi pa nag-sink in sa kanila na star na sila. Hindi pa puwedeng lumaki ang mga ulo nila dahil marami ang nakabantay at nagbabantay.
- Latest
