Sarah, Steven madaugon; Diva naguol, nalipay

First of  two parts

CEBU, Philippines - “Fresh-looking” ug gwapa ug gwapo gyud ang duruha, gitumbok nga rason sa ilang kadaugan. Dili pud malimod nga perte gyung bagaa og fan base sa duruha sanglit didto sa Araneta Coliseum, daw mutay-og sa kasaba gumikan sa makabungog nga hugyaw sa ilang mga tigpaluyo matag commercial break.

Mokabat ngadto sa P5 million nga cash prize ug exclusive management contract ang nadawat sa duruha. Nunot niini mao ang posibilidad nga isip parehong mga mananaog sila maoy pareson sa GMA-7 Artist Center isip magka-love team. Dinhi medyo dunay intriga na pud nga mutumaw tali ni Sarah ug sa pambato sa Sugbo nga si Diva Mantalaba, kinsa maoy First Princess.

Kini tungod kay sa presscon human mismo sa Final Judgement Night, giangkon ni Diva ngadto sa Cebu press nga “Oo” na lang ang kuwang sa relasyon nila ni Steven, ug maoy ilang klarohon kung unsa gyud ang ilang estado. Dungan niini, subling giangkon ni Diva nga sukad pa niadtong Final 100, na “crush” na siya kang Steven nga pambato sa Davao. Managsama og gibati sa usa’g-usa sila si Steven ug Diva.

Gani, wala nay pugong-pugong sila si Steven ug Diva atol sa interview sa press, tungod kay perte gyud nilang naka-holding hands—walay buhi-buhi. Ang mga tigbalita nga nagpunsisok nilang duha, wala makapugong sa ilang gibati ug nagsigi og sungog sa duruha. Usa lang ang hukom sa press—dili ikalimod ang grabe kaayo nga “chemistry” ni Diva ug Steven.

Bisan pa man sa pagdumili sa duruha sa ilang tinuod nga gibati, mga kawani sa Casa Puro, diin mipuyo og dugay nagkahiusa sa pag-ingon nga labaw pa sa suod nga panaghigalaay ang relasyon nila ni Steven ug Diva.

Diva Okay

Dismayado man tuod ang kadaghanan sa mga supporters ni Diva gumikan sa iyang pagkaparot gikan sa maong reality-artista search, pero malipayon gihapon ang pambato sa Sugbo sa iyang naabot nga kalampusan. Matud niya, nga igo lamang niyang giampo kaniadto nga masulod siya sa Final 14 aron dili mapakauwawan ang Sugbo, pero labaw pa sa iyang gipangayo ang iyang nadawat.

Sa iyang pagkalakip sa Final Five, matud ni Diva nga wala siya mag-ampo sa Ginoo nga siya maoy mudaog, kundili nangaliyupo lamang siya nga hatagan siya og kaisog pagdawat sa resulta. “I prayed nga bisan unsay mahitabo, gayran ko Niya ug himuon ko Niya nga strong.”

Giangkon niya nga samtang nagpadayon ang paghukom niadtong Domingo sa gabii, nakulbaan gyud siya og maayo. “Nakulbaan ko okay basin dili good performance akong mahatag.”

Pero kung naguol man gani siya nga napildi siya, 5% ra matud pa. “Dili ko magplinastik ha? O naguol ko, pero 5% ra, kay it’s a great award being the first princess.”

Sa pangutana kung sa performance ba kaha siya napildi, dakong supak si Diva. “That was my best. I did very well.”

Apan, walay dautang pulong si Diva sa kadaugan ni Sarah. “It’s really her (Sarah) moment.”

Sa isyu nga posibling mag-away na pud sila ni Sarah tungod ni Steven nga suod ni Diva, gipasalig sa garbo sa Sugbo nga dili gyud kini mahitabo tungod kay bata pa kaayo si Sarah ug wala kini hilig sa “boys.”

Hinuon si Diva mismo, mipasalig hatagan gyud niya igong pagtagad ang iyang pag-artista tungod kay mao gyud kini iyang pangandoy sa kinabuhi. “Unya ra nang laki, hinay-hinay ra ana.”

Walay puas-ang pagpasalamat ni Diva sa tanang misuporta niya, ilabi na sa mga Sugbuanon. “Kamo nay bahala og pasalamat sa mga taga Cebu para nako ha, kay basin dugay pa ko makauli didto,” nagkanayon siya sa Cebu press. “Salamat gyud kaayo, daghang salamat.”

Samtang giklaro ni Diva nga inanay na nga nahibalik ang maayo nila nga relasyon ni Sarah, human sila nagkasumpaki gumikan sa komentaryo sa nauwahi nga nakapahiubos sa nahauna.

“Siguro 80% okay na mi ni Sarah. Mag-istorya pa mi og balik, pero okay naman mi. Nagsabot pa gani mi nga magtipon mi og puyo sa usa ka balay, kaming tulo ni Nina Kodaka,” pasigarbo pa ni Diva.

Dungan niini, gitino pud ni Sarah ang giingon ni Diva nga samtang nagpaabot sila sa resulta ibabaw sa entablado, gipasalig nila sa usa’g-usa nga bisan kinsa nilang duha ang makadaog, dunay madawat nga “balato” ang mapildi.

Mikabat ngadto sa P200 thousand ang premyo nga nadawat ni Diva, ingon man exclusive contract sa GMA-7. Kagahapon, pasado alas singko sa hapon, gihimamat na sa GMA Artist Center ang Final Five—Sarah Lahbati, Steven Silva, Enzo Pineda, Diva ug Rocco Nacino—-aron sabutan unsay nagpaabot nila nga proyekto karon nga artista na gyud sila.

Atangi ugma: Unsay reaksyon sa GMA-7 management, ilabi na ni President & CEO Atty. Felipe Gozon? Unsay naistoryahan nila ni Steven ug Diva sa wala pa ipahibaw ang resulta? Kana ug daghan pa nga mga detalye nga wala makita sa camera didto sa Araneta, inyong mabasa ugma puhon dinhi lang sa Hugyaw.