Ynna 'di alam kung sino ang susundin

MANILA, Philippines - Gagawing mas espesyal ng SRO Cinemaserye ang Bu­wan ng mga Puso sa pinakabago nitong pre­sentasyon, ang Meet the Fathers.

Nagsimula na last week, itatampok ng Meet the Fathers ang makulay, madamdamin at pambihirang kuwento ng buhay ng isang dalaga na pinagkalooban ng dalawang ama.

Ang four-part episode na ito ay pinagbibidahan ni Mr. Christopher de Leon bilang Larry, isang business magnate na ubod ng yaman na makikipag-negosasyon kay Rigor (Bayani Agbayani), isang pilantropo sa Ba­silan.

Makikipag-deal si Larry kay Rigor na bibigyan niya ng donasyon ang bahay-ampunan nito sa kondisyong pupunta ito sa Maynila upang magkaharap sila ng personal.

Sa kanilang pagtatagpo, madidiskubre ni Rigor na hindi tinupad ni Larry ang kanilang napagkasunduan. Kahit gusto na nitong umalis, pinagbigyan pa rin niya ang pinakahuling kahilingan ni Larry na dumalo siya sa wedding engagement party ng kanyang anak na si, Cheska (Ynna Asistio).

Sa engagement party, magugulat si Rigor nang ipakilala ni Larry sa kanya ang asawa na si Christy (Angel Jacob) na kanya palang one and only great love. Lalong magdududa si Rigor nang malaman niyang hindi pala anak ni Larry si Cheska – ibig sabihin, maaaring siya ang tunay na ama nito!

Kukumprontahin naman ni Christy si Larry dahil sa tingin niya ay isa lamang ito sa mga plano ng asawa. Pero ipagdidiinan ni Larry na twist of fate ang pang­yayari sa kanilang buhay.

Naging blessing in disguise pa ang kanilang di inaasahang pagsasama dahil naki­lala ni Cheska ang kanyang tunay na ama bago ang kasal. 

Ngunit biglang magkakaproblema si Cheska dahil malalaman nito na ang lalaking pakakasalan na si Brent (Joross Gamboa) ay palikero pala. Dito lalabas ang pagiging ama nina Larry at Rigor kay Cheska hanggang sa makipag-kompetisyon sila sa atensiyon at pagtulong sa anak.

 Sa ilalim ng direksiyon ni Andoy Ranay kasama ng team ng creative screenwriters na pinangungunahan ni Jake Tordesillas, tampok rin sa episode na ito sina Dexter Doria bilang Mamu at Jacob Rica bilang Lyle. Tuwing Huwe­bes ito ng gabi napapanood.