Kalaban ni Marian, dumarami!

MANILA, Philippines - Paano magwawagi ang isang superhero laban sa mga nagsanib puwersang mga super enemies? At kung bibigyan ng pagkakataonng mamili, alin ang karapat-dapat piliin ng isang nilalang - ang misyong ipagtanggol ang buong mundo o ang makapiling ang minamahal at mamuhay ng normal?

Ilan lang ito sa mga katanungang masasagot sa huling dalawang linggo ng pakikipagsapalaran ni Darna (Marian Rivera) simula ngayong Lunes matapos magsanib puwersa ang magkakapatid na ulupong na sina Zandro (Paolo Contis), Valentina (Iwa Moto) at Serpina (Katrina Halili). Bukod pa rito, muling nagbalik ang unang kalaban ni Darna na naghasik ng lagim sa buong San Martin – si Roma, ang Babaeng Impakta (Nadine Samonte)!

Matatandaan na nagpakamatay si Roma para matigil na ang mga kasamaan na hindi naman niya talagang gustong gawin pero dahil sa impluwensiya ng kakambal at demonyitong si Impy (Mura) ay nakapatay siya ng mga inosenteng tao. Pero itinago pala ni Dr. Morgan (Ricky Davao) ang kanyang katawan sa laboratoryo nito at ginawang subject ng eksperimento.

Samantala, nahirapan si Darna na makaalis sa hawla kung saan siya ikinulong ng magkakapatid na ahas. Isinama rin si Pancho (Dennis Trillo) sa hawla kaya lalong hirap ang puso ng dalagang superhero. 

Pero nalinlang ni Darna si Valentina kaya nakatakas ito samantalang si Pancho ay sinaktan ni Zandro habang papatakas ang binata. Isinugod agad sa ospital si Pancho pero naging comatose ito. Hirap na hirap ang kalooban ni Narda lalo’t muling nagbalik sa kanya ang sakit nang pagkawala ng dating minamahal na si Eduardo. Tuluyan na nga bang isusuko ni Darna ang bato para sa pag-ibig niya kay Pancho? Kasalan na ba ang kahahantungan ng pag-iibigang Pancho at Narda?

Samantala, tinanggihan ni Serpina si Zandro na paramihin ang kanilang lahi dahil si Gabriel (Alfred Vargas) ang gustong makaniig ng dalaga. Kaya papayag na si Zandro na punlaan si Valentina para matupad ang kanilang misyon!

Huwag palagpasin ang maaksiyong gabi at dumaraming mga rebelasyon sa nangungunang telefantasya sa bansa – Darna – gabi-gabi mula Lunes hanggang Biyernes sa GMA Telebabad pagkatapos ng 24 Oras.