Krista sinundan si Manny sa Amerika!?
Umalis uli si Krista Ranillo noong Sabado nang gabi. Inabangan siya ng mga TV crew sa Centennial Airport at tulad nang dati, nagmamadali raw ang sexy star sa pagpasok sa departure area.
Na-master na ni Krista ang pag-iwas sa media para hindi niya masagot ang mga itatanong sa kanya like, kagagaling lang niya sa Amerika, bakit babalik naman siya?
Siyempre, umiral ang malisya ng mga tao. Nag-one-plus-one sila. Posible raw kaya na magkita sina Krista at Manny Pacquiao dahil nasa Los Angeles ito para sa kanyang boxing training?
Eh nagpainterbyu si Jinkee Pacquiao na next month pa siya lilipad sa Amerika para magkasama sila ni Manny sa Valentine’s Day. Ang reaksiyon ng mga malisyosa, marami ang puwedeng mangyari mula ngayon hanggang sa Araw ng mga Puso.
* * *
Sa totoo lang, si Krista ang dapat sisihin sa pag-aabang na ginagawa sa kanya ng mga reporter sa departure area.
Puwedeng-puwede na ilihim niya ang kanyang pag-alis pero nalalaman ito ng mga reporter. Kung sa palagay niya eh mga empleyado ng airlines ang source ng pag-alis niya, magpalit siya ng eroplano na sasakyan, maliban na lang kung nanghihinayang siya na mileage na mawawala sa kanya.
Kung naging discreet si Krista noon, baka hindi lumaki ang isyu tungkol sa kanila ni Manny. Takaw-pansin din ang ‘escort’ niya sa tuwing aalis at darating siya sa airport. Bakit may escort pa siya eh wala namang banta sa kanyang buhay? Napaka-harmless ng mga reporter, lalo na ng mga showbiz reporter.
* * *
Hindi lang ako ang nakapuna ng hindi matapus-tapos na pagpuri ni Suzette Ranillo kay Manny Pacquiao nang pumayag siya na magpainterbyu sa Startalk noong Sabado.
As usual, binigyan ng malisya ang mga puri ni Suzette sa Pambansang Kamao dahil kung ikaw ang nasa puwesto ni Manny, talagang mapa-flatter ka sa praises ng tiya ni Krista.
Nag-apologize din si Suzette kay Bianca King. Nilinaw ni Suzette na hindi siya ang naglabas ng mga gamit ni Bianca mula sa tent ni Krista sa shooting ng Wapakman. Totoo ang sinabi ni Suzette. Hindi siya ang naglabas ng mga gamit ni Bianca pero puwedeng siya ang nag-utos. May malaking pagkakaiba ang naglabas at nag-utos na ilabas. May lusot ang Pambansang Tiya! Pambansang Tiya raw o!
* * *
Nasa Hong Kong pala si Gina Alajar dahil dumalo siya ng screening doon ng Dukot. Wanted si Gina ng mga reporter dahil ipasasagot sa kanya ang statement ni Suzette na huwag niyang ibintang kay Krista ang paghihiwalay nila ni Michael de Mesa.
Malumanay ang pagbibitaw ni Suzette sa kanyang statement pero sapat na ito para makaamoy ng word war ang mga reporter. Hinahanap nila si Gina para sa reaksiyon nito sa mga salitang pinakawalan ni Suzette. Knowing Gina, hindi nito uurungan si Suzette. Sure ang lahat na may sagot siya sa number one defender ni Krista.
- Latest
